As catro torres de refrigeración da antiga central térmica de As Pontes xa son historia despois de que este mércores fosen derrubadas mediante unha voladura controlada con 425 quilos de explosivos. Tal e como informou Endesa, a demolición das estruturas —de 99 metros de altura e 11.245 toneladas cada unha— non puido realizarse de forma simultánea tal e como estaba previsto debido a un desfase nas telecomunicacións, o que provocou que dúas das torres caixesen ás 16:01 horas e as outras dúas o fosen fixeron un cuarto de hora despois. O impacto, seguido con aplausos, emoción e numerosos pícnics dende a praia do lago e os arredores, marca o peche dun símbolo industrial aberto en 1976 e abre a porta a unha nova etapa con suelo industrial dispoñible e novos proxectos na comarca.
A complexa operación xerou unhas 45.000 toneladas de residuos, principalmente formigón e ferro, dos que se valorizarán máis do 90% nun proceso de residuo cero coordinado con medidas de seguridade, canons nebulizadores contra o po e cortes de tráfico nos accesos coa colaboración da Garda Civil e a Policía Local. Mentres o alcalde pontés, Valentín González Formoso, subliñaba a importancia de pasar páxina con medio millón de metros cadrados dispoñibles para o futuro industrial, os veciños e antigos traballadores despedíronse con nostalxia das icónicas construcións, mantendo a esperanza de que se preserve a gran cheminea de 365 metros mentres continúan os traballos de desmantelamento total da planta, previstos para xullo de 2028.
