A multinacional Indra poñerá en marcha unha nova fábrica de vehículos militares no concello coruñés das Pontes, un proxecto co que o xigante tecnolóxico investirá uns 18 millóns de euros e creará entre 70 e 120 postos de traballo directos altamente cualificados. Tal e como informou a compañía nun comunicado, a actuación desenvolverase nunha parcela de máis de 50.000 metros cadrados —con case 15.000 metros de superficie construída— situada no polígono de Penapurreira e que pertencía dende 2018 á empresa Hierros Añón, sumando ademais un novo piar ao corredor norte de plataformas terrestres de Europa.
O centro encargarase de integrar vehículos anfibios de combate, lanzapuentes e sistemas de artillería sobre rodas para as Forzas Armadas españolas, contando cunha pista de probas propia para acelerar a súa entrega e validación. O conselleiro delegado de Indra Group, Josep María Recasens, sinalou que a iniciativa busca integrar dixitalización e intelixencia artificial para gañar competitividade, mentres que o alcalde pontés, Valentín González Formoso, cualificou o anuncio como «unha auténtica revolución» que xerará un forte efecto tractor para a industria auxiliar e o emprego na comarca de Ferrolterra.
