Juanma Moreno foi elixido oficialmente presidente de Andalucía este xoves, renovando o seu cargo tras pechar un acordo de goberno con Vox. O pacto, que permitirá aos populares gobernar con estabilidade tras asegurar o apoio dos 15 parlamentarios da formación de Santiago Abascal, supón a entrada desta última no Executivo andaluz por primeira vez na historia.
A formación ultraconservadora asumirá unha vicepresidencia que integrará as competencias de Turismo, Desregulamentación, Xustiza e Administración Local, encabezada por Manuel Gavira. Ademais, o acordo garante que o PP contará co apoio de Vox para aprobar os presupostos da lexislatura e inclúe a designación dun senador autonómico a proposta de Vox.
Un pacto de 150 puntos con forte marcado ideolóxico
O documento asinado por ambas as formacións establece unha folla de ruta que vai máis aló da xestión económica, introducindo conceptos polémicos no eido da inmigración. Un dos puntos máis destacados é a “prioridade nacional”, que se aplicará nas axudas e subvencións públicas tendo en conta o “arraigo real, duradeiro e verificable” co territorio.
Entre os compromisos asumidos figuran:
- Inmigración: A Xunta oporase ao reparto de menores migrantes non acompañados e promoverá a “verificación de idade” dos migrantes. Tamén se suprimirán as subvencións a oenegés que o Goberno andaluz considere que favorecen a inmigración ilegal e realizaranse auditorías anuais de todos os gastos relacionados.
- Seguridade e Espazo Público: Prohibirase o uso do burka e o nicab nos espazos públicos antes de que remate este ano e crearase un organismo para detectar posibles fraudes nos padróns municipais.
- Medidas sectoriais: O pacto inclúe a supresión do 50% das subvencións a sindicatos e entidades privadas “sen utilidade pública”, así como o compromiso de non financiar “zonas de baixas emisións” con fondos propios da Xunta.
- Memoria e Sanidade: A lexislación autonómica sobre memoria democrática será substituída por unha “lei de concordia” antes de final de 2026. No ámbito sanitario, acordouse un aumento salarial para o persoal do Servizo Andaluz de Saúde (SAS).
Con este movemento, o PP andaluz busca asegurar a lexislatura pechando as portas a calquera bloqueo parlamentario, mentres que Vox logra o seu obxectivo de entrar nas institucións de goberno da comunidade máis poboada de España.
