A Sección Penal de Vigo pechou este luns o caso dun pai que secuestrou a súa filla de 6 anos en 2023, levándoa a Marrocos e aos Emiratos Árabes Unidos sen o consentimento da nai. O home, de nacionalidade marroquí, aceptou unha condena de dous anos e un día de prisión por un delito de subtracción internacional de menores. A pena de cárcere será substituída pola súa expulsión do territorio español, coa prohibición de regresar durante unha década.
A sentenza tamén implica a inhabilitación do home para exercer a patria potestade sobre a nena durante o mesmo período de dez anos. Ademais, terá prohibido aproximarse ou comunicarse coa menor e deberá abonar unha indemnización de 6.000 euros en concepto de danos morais.
O rapto e a loita pola recuperación
O suceso comezou en novembro de 2023, pouco despois de que a parella, que residía en Vigo, iniciase os trámites de divorcio. Sen permiso da nai nin resolución xudicial que o avalase, o home levou a pequena até o aeroporto de Porto para fuxir en avión ata Marrakech.
A nai denunciou a desaparición ao comprobar que a nena non asistía á escola. Durante meses, a muller permaneceu sen información e sen comunicación algunha coa súa filla. Mentres o xulgado vigués avanzaba no proceso de divorcio, outorgándolle a garda e custodia á nai, emitiuse unha orde internacional de detención contra o exmarido.
A nena finalmente foi recuperada tras máis dun ano de ausencia. A sentenza detalla que o acusado entregara a menor á súa tía en Marrocos, onde permaneceu ata que, en decembro de 2024, un tribunal marroquí ordenou o seu traslado de volta a Vigo.
