A Comisión Interuniversitaria de Galicia (CIUG) fixo públicos os criterios de corrección para a pregunta máis controvertida do exame de Historia de España desta selectividade: aquela que solicitaba comparar o socialismo e o anarquismo durante a segunda metade do século XIX. Tras as protestas de profesorado e alumnado por un enunciado que non se axustaba ao preparo da materia, a CIUG aplicará unha fórmula flexible que evita que os estudantes se vexan prexudicados.
A principal novidade é que non se esixirá de xeito estrito o formato comparativo. Aqueles alumnos que desenvolvesen o tema de xeito teórico —explicando correctamente ambos os movementos, as súas ideas ou as súas diferenzas— poderán optar á máxima cualificación de 2,5 puntos, sempre que o fixesen de xeito adecuado.
Criterios de aprobado e nota máxima
Os correctores aplicarán a mesma escala de notas tanto para as respostas comparativas como para as desenvolvidas de forma teórica. Segundo os criterios publicados, os niveis de esixencia serán os seguintes:
- Aprobado (1,25 a 1,74 puntos): Conseguirase indicando semellanzas ou diferenzas básicas, como a crítica ao capitalismo, a loita polos dereitos laborais ou a distinta visión do Estado.
- Notable (1,75 a 2,24 puntos): Requirirase explicar con certa profundidade polo menos unha das diferenzas ou semellanzas e manter unha redacción correcta.
- Sobresaliente (2,25 a 2,5 puntos): Será necesario desenvolver con profundidade polo menos dous aspectos, xunto cunha argumentación coherente e vocabulario adecuado.
As respostas sen relación coa materia recibirán un cero, mentres que as redaccións confusas ou incompletas serán avaliadas por debaixo do aprobado (entre 0,1 e 1,24 puntos).
Qué pasa con quen deixou a pregunta en branco?
A CIUG tamén deu instrucións para os casos nos que o alumno optou por non contestar a cuestión por considerala allea ao temario. Nestas situacións:
- Non se aplicará un cero de xeito automático.
- A nota ponderarase segundo o rendemento nas outras tres preguntas do exame.
- Se a nota ponderada é inferior a cinco, asignarase directamente o aprobado mínimo nesta cuestión: 1,25 puntos.
Outros criterios de avaliación
Ademais da flexibilidade nesta pregunta, a CIUG lembrou que a presentación, a coherencia e a corrección gramatical e ortográfica computarán un 10% da nota total do exame de Historia. Tamén se publicaron criterios específicos para a outra opción do mesmo apartado, centrada na Guerra Civil, onde se valorará a capacidade de comparar os bandos republicano e sublevado sen penalizar por non seguir un formato ríxido.
Esta medida pretende amortiguar o impacto dunha das incidencias máis comentadas desta convocatoria da PAU, ofrecendo un maior marxe aos correctores e garantindo que o coñecemento real do alumnado sexa o factor determinante na nota final.
