O deporte galego está de celebración. O presidente da Xunta, Alfonso Rueda, presidiu este martes a recepción oficial ao Mecalia Atlético Guardés para recoñecer o fito acadado o pasado domingo: converterse no primeiro club de balonmán de Galicia en conquistar un trofeo europeo.
No acto, ao que tamén asistiu o conselleiro de Presidencia, Xustiza e Deportes, Diego Calvo, Rueda felicitou ás xogadoras, ao corpo técnico e á directiva, facendo extensiva a enhoraboa á afección do pavillón da Sangriña. O mandatario puxo en valor a “proeza histórica” dun club que logrou chegar ao cumio do balonmán continental.
Un referente desde A Guarda
Para o presidente autonómico, o mérito do equipo é dobre. Salientou a capacidade do club para competir contra os mellores na elite sendo unha entidade dunha localidade que, aínda sendo “fermosa e importante”, conta cunha poboación reducida en comparación con outras grandes cidades europeas.
“É un referente indiscutible do deporte feminino para as novas xeracións e un orgullo para toda Galicia”, afirmou Rueda. Durante a súa intervención, o presidente tamén destacou que este éxito é unha mostra máis do selo “Galicia Calidade”, animando ao equipo a manter esta ambición para seguir sumando éxitos nun momento que definiu como “de gran nivel” para o deporte galego.
Escoita aquí as palabras de Alfonso Rueda:
![Pinterest](https://pinterest.com/pin/create/button/?url=https://www.siradio.gal/2026/05/26/reception-oficial-mecalia-atletico-guardes/&media=https://www.siradio.gal/wp-content/uploads/2026/05/260526_Pte_Presidencia_AtlGuardes_DCS_09.jpg&description=Alfonso Rueda recibe ao Mecalia Atlético Guardés tras gañar o primeiro título europeo de balonmán para un club galego, destacando a "proeza histórica" do equipo.){kind=link}