Un equipo do Servizo de Gardacostas de Galicia recuperou este venres o corpo sen vida dun home que flotaba nas augas próximas á Torre de Hércules, na Coruña. O aviso recibiuse no 112 Galicia pouco despois das 10:00 horas, momento no que a tripulación dun pesqueiro alertou do avistamento dun cadáver a unha milla cara ao norte do icónico monumento.
Tras a alerta, a embarcación Punta Seixo Branco de Gardacostas desprazouse ata a zona e procedeu á recuperación do corpo. O cadáver permaneceu a bordo do barco, baixo custodia da Policía Autonómica, ata a chegada dunha patrulleira da Garda Civil. Foron os axentes do instituto armado os que se encargaron do traslado dos restos mortais ata o porto de Oza.
Neste momento, as forzas de seguridade manteñen abertas as pescudas para lograr a identificación da persoa falecida.
