Miguel Anxo Fernández Lores xa iniciou oficialmente a carreira para revalidar a Alcaldía de Pontevedra da man do BNG. Baixo o lema ‘A por todas Pontevedra’, o actual rexedor presentouse como o líder dun proxecto que busca implicar á veciñanza nunha nova etapa de goberno. Segundo asegurou Lores, a cidade “non ten teito” e o reto é seguir indo “un paso por diante”.
O candidato nacionalista sinalou que, tras un mandato de traballo “complexo e escuro”, a cidade está preparada para recoller unha “colleita excepcional”. Lores insistiu en que o seu modelo garante máis calidade de vida e dinamismo económico en todos os barrios e parroquias do concello.
Próximos retos e proxectos en marcha
Durante a súa comparecencia, o alcalde destacou o calendario de eventos internacionais que sitúan a Pontevedra no mapa, como a Copa do Mundo de Natación Artística este mes ou as Series Mundiais de Triatlon en setembro. No ámbito urbano e ambiental, mencionou actuacións clave como a renaturalización do Gafos, o futuro parque da Parda e a recuperación da ría tras a marcha de Ence.
Lores tamén puxo en valor o recoñecemento internacional do modelo pontevedrés, bromeando co feito de que xa espertou o interese de case todos os continentes. “Todo o mundo quere coñecer como fixemos este proxecto entre todas”, afirmou.
Renovación na lista e acto oficial
Aínda que os nomes da candidatura están por decidir, Lores adiantou que haberá renovacións, pero tamén a súa intención de seguir contando coa experiencia de veteranos como César Mosquera e Raimundo González. A responsable local do BNG, Sabela Bará, subliñó que Lores foi elixido “por unanimidade e aclamación”, definíndoo como a garantía de que Pontevedra siga sendo unha cidade de vangarda.
A formación nacionalista convocou á veciñanza ao acto oficial de presentación da candidatura, que terá lugar o vindeiro xoves 28 de maio no Auditorio Afundación.
