Efectivos da Policía Local de Mos, en colaboración coa Garda Civil, procederon onte ao desaloxo dun conxunto de vivendas situadas na parroquia de Sanguiñeda, coa finalidade de proceder á súa posterior demolición.
As edificacións, que se atopaban en estado ruinoso, eran frecuentadas por persoas con problemas de drogodependencia e estaban vinculadas ao consumo e á venda de substancias estupefacientes. O lugar fora obxecto de múltiples intervencións por parte das forzas e corpos de seguridade.
A actuación busca restaurar a seguridade cidadá, poñer fin á actividade relacionada coas drogas neste espazo e mellorar as condicións de seguridade na contorna. “O estado de abandono dos inmobles e os problemas asociados ao seu uso facían necesaria unha intervención para evitar que continuasen sendo utilizados para estes fins” aseguran dende o goberno local.
O operativo desenvolveuse de maneira coordinada entre a Policía Local e a Garda Civil, nunha actuación orientada a recuperar este espazo e dar resposta a unha situación que viña xerando preocupación pola súa vinculación co consumo e a venda de drogas.
Co desaloxo e a posterior demolición das edificacións, o Concello de Mos busca contribuír á recuperación da seguridade na parroquia de Sanguiñeda e evitar que estes inmobles continúen sendo un foco de actividade ilícita.
