A secretaria xeral do PPdeG, Paula Prado, solicitou ás universidades públicas galegas que estuden o adianto do prazo de matrícula para os estudos de máster. Segundo trasladou durante unha reunión de traballo coa reitora da Universidade de Santiago de Compostela (USC), Rosa Crujeiras, o actual calendario, que non permite formalizar a matrícula ata setembro, dificulta a planificación dos estudantes. Para Prado, realizar este trámite durante o verán facilitaría a organización do alumnado e axudaría a atraer máis talento ás aulas galegas.
No encontro, no que tamén participou o deputado Julio García Comesaña, os populares fixeron balance da colaboración entre o Goberno galego e a USC. Prado enxalzou a universidade pública galega como un sistema «competitivo e innovador», destacando como medida estrela a matrícula gratuíta, que alcanza xa o seu terceiro ano de vixencia. Tal e como informou a secretaria xeral, esta iniciativa beneficia a 27.700 estudantes este curso e supón un aforro de 20 millóns de euros para as familias galegas.
Investimentos e infraestruturas
A representante do PPdeG quixo poñer o foco nos investimentos autonómicos vinculados á USC. Entre os proxectos destacados figuran a construción da nova Facultade de Farmacia, que conta cunha achega da Xunta de 12 millóns de euros, e o plan de financiamento que, segundo explicou Prado, garante a «estabilidade» necesaria para o desenvolvemento da institución.
Tamén fixo referencia á captación de talento e investigación, mencionando os 9,3 millóns de euros destinados a convenios de I+D e o impulso ao Instituto Iterra, no campus de Lugo, para potenciar a investigación de excelencia.
«Non terlle medo» ao ámbito privado
Durante a reunión, na que tamén se abordou a problemática da vivenda para os estudantes e o papel das residencias universitarias, Paula Prado lanzou unha mensaxe sobre a convivencia de modelos. A secretaria xeral avogou por non «desprezar» posibles proxectos de ámbito privado no eido universitario, sempre que «cumpran cos estándares de calidade», insistindo en que non se debe ter «medo» a estas iniciativas.
Finalmente, a dirixente popular aproveitou a súa visita para felicitar publicamente a Rosa Crujeiras, a primeira muller en ocupar a reitoría da USC, cualificando de fundamental seguir fomentando a presenza feminina nos postos de responsabilidade das institucións académicas.
 propón á USC e ao resto de universidades galegas adiantar o prazo de matrícula dos másteres para mellorar a planificación dos estudantes.){kind=link}