A raíña Sofía desprazouse este mércores a Galicia para coñecer de primeira man o estado dos proxectos de restauración ambiental nas zonas máis castigadas polos incendios de agosto do ano pasado. A súa axenda centrouse en Rubiá (Ourense) e Folgoso do Courel (Lugo), onde a Fundación Reina Sofía financia actuacións de recuperación xunto á Xunta de Galicia.
O investimento total supera os 140.000 euros, dos cales a fundación aporta 65.000, destinados a proxectos con forte impacto local. Estas actuacións buscan non só sanar a ferida paisaxística, senón poñer en valor o patrimonio esquecido que quedou á vista tras o paso do lume.
O rescate da alvariza de Oulego
A primeira parada da raíña tivo lugar en Oulego, no concello de Rubiá. Alí, os incendios actuaron como unha “desbrozadora natural”, sacando á luz unha antiga alvariza —construción de pedra para protexer as colmeas dos osos— que levaba décadas oculta baixo a maleza.
Grazas ao apoio da fundación (50.000 euros), este ben histórico será rehabilitado para o seu uso por parte dunha empresa de apiturismo local. Para os veciños, que descoñecían a existencia desta xoia patrimonial, a visita real supón un recoñecemento moi especia.
Símbolo de resiliencia en O Courel
Posteriormente, a raíña emérita trasladouse a Folgoso do Courel, unha zona declarada reserva da biosfera e geoparque pola Unesco. En Vilar, unha aldea que foi case totalmente destruída polo lume en 2022, a raíña mantivo un encontro cos veciños para coñecer os esforzos de reconstrución.
A visita completouse cun desprazamento a Vilamor, onde foi recibida con música de gaita, para rematar supervisando o futuro plan de replantación do souto de Vilar, un bosque centenario que será recuperado co apoio económico da fundación e da Consellería de Medio Ambiente.
Durante toda a xornada, doña Sofía foi recibida entre mostras de agarimo polos veciños, nun contexto marcado pola intensa calor. As autoridades presentes, entre as que se atopaban a conselleira de Medio Ambiente, Ángeles Vázquez, e o delegado do Goberno, Pedro Blanco, destacaron que estas intervencións son clave para devolver o dinamismo ambiental e económico a estas comarcas montañosas.
