O sistema universitario galego vive un arranque de proceso de admisión atípico. Segundo as listas publicadas este martes, Medicina é o único grao que esgotou todas as súas prazas no primeiro chamamento, unha situación inédita, xa que habitualmente unha vintena de titulacións pechaban nesta fase inicial. Isto significa que, agás a carreira da USC, o resto dos graos da comunidade permanecerán abertos durante toda a semana para os estudantes que aguardan un oco nas súas opcións preferentes.
Os preto de 13.000 alumnos que realizaron a pasada PAU en Galicia xa poden consultar se obtiveron praza. Aqueles que sexan convocados para a súa primeira opción dispoñen de 48 horas para formalizar a matrícula —ata as 23.59 horas deste xoves—, un prazo que tamén se aplica aos que, estando convocados nunha carreira que non era a súa prioridade, desexen asegurar a súa praza mentres esperan que se liberen as opcións que colocaron por riba na súa solicitude.
O dominio das titulacións máis esixentes
As notas de acceso confirman que a competencia é máxima nas carreiras máis prestixiosas. A simultaneidade de Matemáticas e Física en Santiago lidera de novo a clasificación como a titulación coa nota máis alta: un 13,449. Séguenlle de preto Enxeñaría Informática e Matemáticas (13,046) e o programa PARS de Enxeñaría Aeronáutica e Aeroespacial (13,010), ambas tamén en Santiago.
Pola súa parte, Medicina sitúase cun 12,844 e Odontoloxía, tamén na capital galega, pecha o grupo de cabeza cun 12,815. O interese polos graos sanitarios esténdese a Enfermaría, que mantén notas elevadas en Santiago (11,940), A Coruña (11,826) e Vigo (11,466).
A puxanza das enxeñarías
Os datos publicados este martes revelan un incremento notorio do interese polas enxeñarías. O caso máis destacado é o PARS de Enxeñaría Informática en Ourense, que escala 2,7 puntos respecto ao ano pasado, pasando dun 5 a un 7,7. Unha tendencia similar rexístrase en Enxeñaría Eléctrica en Vigo, que sube ata o 7,73, e en Tecnoloxías Industriais, que alcanza un 9,41 no campus olívico.
Pola contra, entre as titulacións que perden forza na nota de corte, destacan casos como Economía en Santiago ou a simultaneidade de Enxeñaría Agrícola e Forestal, que baixan ao 5, o mínimo exixible, tras pechar o ano pasado con notas moito máis altas.
Que debe facer o alumno agora?
Tras este primeiro chamamento, o estudante pode atoparse en tres escenarios:
- Convocado na súa primeira opción: Ten garantida a praza e debe matricularse antes das 23.59 horas do xoves.
- Convocado nunha opción secundaria: Se a súa opción preferente xa está pechada (actualmente só Medicina), debe matricularse na carreira onde obtivo praza se lle interesa.
- En lista de espera: Debe confirmar que desexa seguir nela e estar atento aos próximos chamamentos, que terán lugar entre xullo e outubro (o seguinte, o 14 de xullo). É fundamental ter en conta que a praza na carreira onde figura convocado resérvase ata que se resolvan as listas superiores.
