O Goberno central e as comunidades autónomas mantiveron este luns unha nova reunión do Consello de Política Fiscal e Financeira (CPFF), a primeira presidida polo novo ministro de Facenda, Arcadi España. No encontro, o Executivo estatal puxo sobre a mesa un obxectivo de déficit do 0,1 % do PIB para os anos 2027, 2028 e 2029, a mesma cifra que xa foi rexeitada polo Congreso o ano pasado.
O conselleiro de Facenda de Galicia, Miguel Corgos, acudiu á cita cun «escepticismo» motivado polas promesas incumpridas do Goberno central en anteriores exercicios. Ante a proposta ministerial, Corgos subliñou que o aspecto crítico non é só o obxectivo de déficit, senón a regra de gasto: «O importante é canto podemos gastar máis as comunidades para prestar os nosos servizos públicos fundamentais o ano que vén».
As demandas de Galicia
O conselleiro galego lembrou que as comunidades non só deben afrontar o crecemento do IPC, senón tamén financiar medidas impostas polo Goberno central, como as subas salariais dos funcionarios. Por iso, Corgos reclamou unha regra de gasto «á altura» que garanta a viabilidade das competencias autonómicas.
Pola súa banda, o ministro de Facenda defendeu a súa proposta advertindo que votar en contra implicaría un axuste de 5.849 millóns de euros para as comunidades. Ademais, o Goberno ofreceu un marxe de gasto do 4 % para o próximo exercicio e asegurou que as autonomías recibirán o ano que vén un incremento de financiamento superior ao 8 %, sumando as entregas a conta e a liquidación do sistema.
Choque pola reforma do financiamento
Aínda que o Goberno non incluíu a reforma do modelo de financiamento na orde do día, os conselleiros das comunidades gobernadas polo PP —incluída Galicia— aproveitaron a reunión para poñer este tema sobre a mesa.
O ministro Arcadi España asegurou que este asunto se abordará nun novo Consello de Política Fiscal e Financeira antes de que remate o mes de xullo. O representante galego reiterou o seu compromiso coa estabilidade fiscal, aínda que insistiu en que as cifras anunciadas polo Executivo central deben concretarse finalmente nos Orzamentos Xerais do Estado para que poidan ser consideradas fiables.
