O Ministerio de Facenda iniciou este luns a operativa para poñer en marcha a reforma do financiamento autonómico. Tal e como informou o departamento que dirixe Arcadi España, xa se remitiu unha carta a todas as comunidades de réxime común para concertar encontros bilaterais de xeito inmediato. Estes contactos serán coordinados polo secretario de Estado de Facenda, Jesús Gascón, e poderán realizarse tanto de forma presencial como telemática.
A pesar da vontade do Goberno de avanzar, a proposta atópase cun escenario complexo. Segundo recolle La Voz de Galicia, varios presidentes autonómicos do PP amosaron as súas reticencias cara a este formato de negociación, preferindo tratar un asunto de tal calado en órganos multilaterais. Con todo, o ministro España mantén o seu compromiso de convocar proximamente o Consello de Política Fiscal e Financeira (CPFF), paso previo para que a reforma chegue ao Consello de Ministros e inicie a súa tramitación parlamentaria co obxectivo de que estea aprobada antes de que remate o ano.
Un novo modelo con máis recursos
A proposta, deseñada inicialmente pola exministra María Jesús Montero o pasado mes de xaneiro, pretende dotar ás comunidades de preto de 21.000 millóns de euros adicionais respecto ao modelo vixente de cara ao exercicio 2027. As claves deste novo sistema inclúen:
- Aumento de cesións tributarias: Aumentar o porcentaje de cesión do IRPF do 50 % ao 55 % e do IVE do 50 % ao 56,5 %, o que suporía 16.000 millóns de euros extra para o 2027.
- Reformulación da poboación axustada: O Goberno busca ponderar mellor as variables que inflúen no custo real dos servizos públicos en cada territorio.
- Nova cesta de impostos: Inclúense tributos como o de patrimonio, depósitos bancarios, actividades de xogo e o depósito de residuos en vertedoiros.
Un plan marcado polo rexeitamento
Este plan xa xerou friccións importantes desde a súa presentación no mes de xaneiro. Daquela, a totalidade das comunidades autónomas, excepto Cataluña, expresaron un rexeitamento explícito ao modelo, ao considerar que nacía condicionado por acordos previos entre o Goberno central e ERC.
Ante esta oposición, o Executivo xa trasladou no seu momento que a adscrición ao novo modelo de financiamento será de carácter voluntario. A reforma deberá concretarse nunha lei orgánica, un paso que se prevé complicado dado que algúns dos grupos que actualmente sustentan ao Goberno xa expresaron as súas dúbidas sobre a proposta.
