A dixitalización precoz na infancia e adolescencia en Galicia deixou datos preocupantes. Segundo o estudo Infancia, adolescencia e benestar dixital en Galicia, impulsado por Unicef, un 32% dos menores con parella sufriron algún tipo de violencia dixital. As condutas máis habituais inclúen o control das amizades nas redes, o rastrexo da localización a través dos dispositivos e a revisión do móbil sen consentimento.
O informe, presentado en Santiago polo profesor da USC Antonio Rial Boubeta, debuxa un escenario onde o teléfono móbil é xa unha “ferramenta central”. O 82,4% dos estudantes galegos ten dispositivo propio, ao que acceden de media aos 11 anos. Ademais, o 41% da mocidade durme co móbil na habitación, un factor que, sumado ao uso constante das redes, agrava os problemas de benestar emocional.
Riscos crecentes: pornografía, sexting e redes
O uso intensivo das pantallas estase a traducir en riscos directos para a saúde mental. O estudo alerta de que un 4,7% dos entrevistados presenta un uso problemático das redes sociais, unha taxa que se eleva ata o 7,6% no caso do alumnado de Bacharelato. Este consumo adictivo asóciase con peor calidade de vida e, segundo os datos, chega a cuadruplicar o risco suicida.
A exposición a contidos non axeitados tamén é unha realidade temperá:
- Pornografía: A idade media de inicio de consumo é de 11,6 anos. Un 27,2% do alumnado admite ter visto pornografía, e case un 10% faino de xeito semanal.
- Sexting: As prevalencias sitúanse entre o 6,7% (activo) e o 15,2% (pasivo). Un 8,8% dos mozos recoñece sufrir presións para enviar material erótico.
- Seguridade: O 57,2% recoñece falar con descoñecidos en liña, e un 14,1% admite ter quedado en persoa con alguén que coñeceu por Internet.
O papel da familia e o control dos límites
A pesar de que máis da metade dos proxenitores (56,4%) conversa cos seus fillos sobre os perigos da rede, o control efectivo segue sendo desigual. Só a metade das familias establece límites horarios claros para o uso do móbil, e a porcentaxe redúcese ao 36% cando se trata de supervisar os contidos que os menores comparten publicamente.
No ámbito escolar, o informe detecta unha prevalencia de violencia escolar do 26,2% en Galicia, mentres que a cibervitimización sitúase no 7,9%. Estes datos, que coinciden coa media estatal, poñen sobre a mesa a necesidade de abordar o benestar dixital como unha prioridade educativa e familiar.
