O Partido Popular de Ourense xa ten perfil para a súa futura candidatura á alcaldía. O presidente provincial, Luis Menor, avanzou que a intención da formación é que sexa unha muller quen encabece a lista nas próximas eleccións municipais, un posto para o que suenan con forza a actual portavoz municipal, Ana Méndez, e a deputada no Congreso, Ana Vázquez.
“O máis probable é que, salvo que apareza un Mbappé da política, a cabeza de lista sexa unha muller”, declarou Menor esta semana. O líder provincial recoñeceu que a elección é complexa pola necesidade de atopar un perfil “capaz de ilusionar” ao electorado, algo que se despexará oficialmente a finais de xuño, cando o partido anuncie os seus candidatos nas sete cidades galegas.
Un escenario municipal “aberto”
A un ano da cita coas urnas, os populares encaran o proceso con optimismo moderado. Segundo a última enquisa de Sondaxe, o PP rexistra unha lixeira mellora (pasando de 7 a 8 concelleiros) mentres Democracia Ourensana sofre un desgaste que os situaría con 8 ediles. Para Menor, estes datos confirman que “hai partido” e que a formación loitará por converterse na forza máis votada.
Moción de censura: “Ou votan ao PP ou é imposible”
A posibilidade dunha moción de censura contra Gonzalo Pérez Jácome segue sobre a mesa, pero con escaso percorrido político. Ante a insistencia de PSOE e BNG por liderar unha alternativa, Luis Menor mantívose inamovible nas súas condicións: o PP non entrará en xogos que non garantan a alcaldía para Ana Méndez. “O que teñen que facer é votar ao PP, o demais son imposibles”, zanjou.
Pola súa banda, a portavoz socialista, Natalia González, criticou as “liñas vermellas” dos populares e defendeu que o PSOE, co apoio do BNG, tería máis representación que o PP para conformar un goberno alternativo.
Tensión na Deputación
O clima político ourensán tamén se traslada á Deputación. A actual configuración da institución, onde o PP non goza de maioría absoluta, xerou críticas de Democracia Ourensana, que acusa ao presidente provincial de apoiarse nun deputado tránsfuga (o exsocialista de Barbadás, Xosé Carlos Valcárcel) para manter o control. Menor quitou ferro ao asunto e respondeu con ironía: “De momento, eu estou máis cerca ca el de ter maioría”.
