O proxecto mineiro de Pentes, na Gudiña, encara a súa recta final cara á actividade plena. A firma sueca Eurobattery Minerals, propietaria maioritaria da filial galega Tungsten San Juan, confirmou esta semana a captación de case seis millóns de euros de financiamento a través da firma Loft Capital Limited. Este capital permitirá construír a planta de procesamento mineral e garantir o inicio da produción industrial no primeiro trimestre de 2027.
O acordo articularase mediante unha liña de bonos convertibles dividida en catro tramos durante os dous próximos anos. A compañía xa fixo efectiva a primeira disposición de un millón de euros, o que permite pasar da fase de exploración e muestreo á construción física das instalacións, cuxo equipamento tecnolóxico xa está en marcha.
Un mercado en auxe e peza estratéxica para a UE
A posta en marcha desta explotación chega nun contexto económico moi favorable para o sector. O prezo do volframio experimentou unha subida superior ao 160% ao longo de 2025 e mantén unha tendencia á alza impulsada polas restricións de exportación impostas por China, país que controla máis do 80% da subministración global.
Esta mina é considerada unha peza estratéxica para a autonomía europea. O volframio figura na lista de materias primas críticas da Comisión Europea, e Eurobattery Minerals xa solicitou a Bruxelas que o proxecto de San Juan sexa recoñecido oficialmente como estratéxico baixo o marco regulatorio comunitario para reforzar o abastecemento propio.
Impacto laboral e debate político
A nivel local, a empresa calcula que a mina xerará máis de 130 empregos entre directos e indirectos, ademais do impacto positivo nos servizos, o transporte e as subministracións da comarca. A compañía traballa xa con contratistas da zona coa meta de impulsar a economía local e axudar a frear a despoboación en Ourense.
Mentres o proxecto avanza, o modelo mineiro galego está a ser obxecto de debate no Parlamento de Galicia. A conselleira de Economía e Industria, María Jesús Lorenzana, defendeu recentemente a importancia dunha tramitación rigorosa para todos os proxectos, mentres que o BNG cuestionou a estratexia do Executivo autonómico e a falta dun plan sectorial de actividades extractivas actualizado.
Pola súa banda, a mina da Gudiña mantense á marxe destas discrepancias políticas, xa que conta con todas as licenzas necesarias e un preacordo comercial pechado coa empresa austríaca Wolfram Bergbau und Hütten AG para vender a súa produción durante os próximos doce anos.
