Os partidos da oposición do Concello de Salvaterra de Miño,BNG e PSdeG-PSOE , veñén de mostrar o seu rexeitamento ante a ubicación proposta polo goberno local para o novo auditorio da vila.
Ambos partidos coinciden na necesidade dunha infraestrutura como o auditorio para o municipio, máis consideran que o emprazamento escollido non é o adecuado debido a non localizarse “na zona céntrica da localidade”.
Pola súa banda, o BNG de Salvaterra vén de solicitar ao Concello que teña en conta “a opinión da veciñanza e valore unha localización máis céntrica para o futuro auditorio municipal”. Ao tempo, a portavoz nacionalista, Patricia Mariño subliña que “tanto o Bloque como a maior parte da veciñanza non comparten a localización exposta polo executivo municipal”.
Na súa opinión, “un equipamento das características e funcionalidade do novo auditorio debe situarse no centro urbano para facilitar o seu uso por parte do tecido asociativo e musical do municipio”.
Pola súa banda, o portavoz municipal do PSdeG-PSOE, Félix González, asegura que “a falta dun desenvolvemento urbanístico en Salvaterra fai que o casco urbano cada vez esté máis desperdigado”.
Do mesmo xeito, o voceiro asegura que para “os socialistas a ubicación idónea sería a antiga fábrica de Tamome” xa que na actual proposta de ubicación feita polo goberno local do Partido Popular “non vai crear sinerxias co comercio local do municipio”.
