O Concello de Xinzo de Limia presenta outro ano máis o seu entroido, o máis longo de toda Europa. Este ano, iniciarase o sábado 8 de febreiro co Petardazo e finalizará o domingo 9 de marzo, co Domingo de Piñata. Esta festividade, recoñecida como Festa de Interese Turístico Internacional, está organizada pola Concellería de Festas dirixida por Ricardo Sieiro.
Ademais, o programa dunha duración de máis dun mes de actividades é para todos os públicos. As actividades pódense consultar na páxina web do concello. Nesta edición, destacará a música posto que tocarán máis de 60 charangas e actuarán 40 grupos e artistas. Dende a institución pretenden ofrecer un entroido seguro, accesible e que proporcione unha experiencia de calidade tanto como para a veciñanza como para os visitantes. Así, aspira ser unha vez máis un referente de calidade, tradición, modernidade e seguridade.
O alcalde de Xinzo de Limia, Amador Díaz, subliñou que “o Entroido de Xinzo é unha cita imprescindible, non só para a nosa vila, senón para toda Galicia e máis aló. É un orgullo convidar a todas e todos a participar nunha celebración que pon en valor a nosa cultura, a nosa tradición e a nosa hospitalidade.”
Actividades
O programa iniciarase o 8 de febreiro co Petardazo, dando a benvida ao entroido 2025 ás 00:00 horas na Praza Carlos Casares. Antes e despois desa hora, a festa está asegurada con música e espectáculos. Posteriormente, o día 9, o domingo fareleiro repartirase a fariña ás 17:00 horas na Praza Maior para a farelada.
Xa o sábado 15 colgaráse o meco, que antes percorrerá dende ás 19:30 horas o casco vello dende o o Museo Galego do Entroido ata a Praza de Oriente. O domingo 16, ou do Oleiro, desfrutarase ás 12:30 horas do oleiro Infantil na Praza Maior. Pola tarde, na Praza Maior e nas rúas do casco vello os máis maiores poderán xogar no seu propio Oleiro. Non faltará animación e música durante todo o día. Cómpre lembrar, que as persoas participantes recoméndaselle vestir do estilo da primeira metade do século XX.
No sábado corredoiro, será a xuntaza de disfraces grupos para o baile de corredoiro dende ás 21:00 horas na Praza de San Roque. Dende ese momento, contarase con charangas e a Orquesta Los Players. Ao día seguinte, as pantallas reuniranse no domingo corredoiro saíndo as rúas a partir das 12:00 horas. Ese día volverán actuar as charangas Élite e Sound Band.
Ademais, o venres de entroido este ano o 28 de febreiro, traerá consigo charangas, animacións e a 1ª Festa Glam Entroido de Xinzo, onde actuará Leticia Sabater e recoñecidos Djs.
O primeiro día do mes de marzo, sábado de entroido tocarán varias charangas, agrupacións de música, a Orquesta Trébol, e haberá a actuación de La Duendeneta. O domingo e o luns de entroido, días 2 e 3 de marzo, serán días de festa e música nas que se encontrarán pasarúas con actuacións de charangas. No día 4 de marzo, martes de entroido, ás 17:00 horas iniciarase o Gran Desfile do Entroido 2025, onde se repartirán 3000 euros en premios.
O 5 de marzo será o enterro da sardiña. O sábado de piñata, 8 de marzo, realizarase o xogo da Cucaña na Praza Maior sobre ás 18:30 horas. Posteriormente, dará comezo o baile de Mascaritas e Capuchóns coa animación musical do Dúo Explosión.
Tocando o fin das celebracións o 9 de marzo, domingo de Piñata, ofreceranse actividades infantís e obradoiros. Ademais, a música seguirá nas rúas con charangas e a Orquesta Kubo, dando o broche final do entroido deste ano.
