jueves, febrero 29, 2024
InicioComarcasÁrea de VigoO TSXG confirma a pena de 14 anos ao acusado de asasinar...

O TSXG confirma a pena de 14 anos ao acusado de asasinar en Redondela ao seu provedor de droga

A Sala do Civil e Penal do Tribunal Superior de Xustiza de Galicia (TSXG) confirmou a condena de 14 anos de cárcere que a sección quinta da Audiencia Provincial de Pontevedra, de acordo co veredicto do Tribunal do Xurado, impuxo ao home que o 27 de xaneiro de 2021 asasinou o seu provedor de cocaína en Chapela (Redondela). O xurado, tal e como consta na sentenza, considerou probado que o acusado acudiu ao domicilio da vítima, quen se negou a fiarlle a compra de cocaína, portando unha cinta adhesiva de embalar e unhas luvas de látex. Ao negarse a entregarlle a droga, o condenado, segundo o relato de feitos probados do fallo, dirixiuse ao baño do inmoble, onde se colocou as luvas e, a continuación, “foi por detrás da vítima e pasoulle o brazo polo pescozo, comprimíndoa, á vez que lle tapaba o nariz e/o boca, ocasionándolle a morte por asfixia”.

O acusado, unha vez detido e durante o curso da investigación, recoñeceu parcialmente os feitos e axudou a recuperar o terminal e as chaves do falecido, polo que se tivo en conta a atenuante de confesión. Na resolución, avalada polo TSXG, a Audiencia sinala que o acusado estaba diagnosticado dun trastorno de personalidade con déficit de control de impulsos e dun trastorno por uso de substancias (principalmente alcol e cocaína), que, no momento dos feitos, segundo entendeu acreditado o Tribunal do Xurado, “minguaba levemente a súa capacidade para darse conta do que facía ou para actuar de acordo con dita comprensión”, por iso, aplicóuselle a atenuante de drogadicción.

Desta forma, o alto tribunal galego rexeitou o recurso de apelación interposto polo procesado. A Sala do Civil e Penal lembra no fallo que “se deben rexeitar de plano os motivos de apelación nos que a posta en cuestión da valoración probatoria do Xurado se efectúa á marxe da denuncia de existencia de erro derivado dalgún documento ou dunha pericial documentada, única e inequívoca, concluínte nos seus resultados ou con virtualidade per se para evidencialo”. Así, destaca que o TSXG carece de competencia -igual que sucede co Tribunal Supremo- para valorar a proba persoal practicada, ponderación que corresponde de maneira exclusiva e excluínte ao tribunal a quo.

ARTIGOS RELACIONADOS

+ POPULAR

COMENTARIOS RECENTES