A borrasca Efrain deixa choiva de máis de 60 litros por metro cadrado en zonas das provincias da Coruña e refachos de case 150 km/h.
Meteogalicia rexistrou acumulacións de choiva próximas aos 60 litros por metro cadrado en Rois, en localidades ourensás como Avión ou Entrimo ou nas pontevedresas de Tui ou Vilanova de Arousa.
O temporal tamén está a deixar forte vento na comunidade, con refachos de máis 100 km/h en puntos das catro provincias (147 en Carballeda de Valdeorras, 128 en Oia ou Vimianzo 127). No mar a situación tamén se complicou e a navieira Mar de Ons comunicou que suspende o transporte entre Cangas e Vigo ata novo aviso debido ás malas condicións meteorolóxicas.
Varios voos con destino ao aeroporto de Peinador de Vigo foron desviados na mañá deste luns debido á «meteoroloxía adversa» que vive a cidade, segundo informaron fontes de Aena.
En concreto, un avión procedente de Madrid foi desviado a Santiago de Compostela polo vento, por iso, os seus pasaxeiros foron desprazados por estrada para finalizar o traxecto a Vigo.
Esta situación motivou que os viaxeiros do seguinte voo a Madrid desde Vigo tivesen que ser trasladados tamén en autobús á capital galega para coller o voo na Lavacolla, debido a que o seu avión estaba alí. Ademais, outro voo que partiu de Barcelona foi desviado a Madrid, ao non poder aterrar en Vigo tamén polo vento.
O voo procedente de Madrid con destino Vigo das 11:45 horas foi desviado a Santiago de Compostela e a chegada de Madrid das 13:00 horas foi cancelada.
Este luns mantense activo o aviso laranxa por temporal costeiro nas provincias da Coruña e Lugo. Prevense ondas de ata cinco metros debido ao mar de fondo e vento do suroeste forza 8 de ata 74 quilómetros por hora na Mariña e no noroeste da Coruña. No resto do litoral galego o nivel de aviso é amarelo.
