A obra, que estará rematada nunha semana, ten un orzamento total de preto de 45.000 euros e conta con subvención autonómica de 31.000 euros
A alcaldesa de Mos, Nidia Arévalo, o edil de Deportes, José Areal, e o monitor deportivo Nacho Carballido, visitaron os traballos de mellora da pista polideportiva de San Eleuterio. A optimización da instalación deportiva, prevese que quede rematada no prazo dunha semana se a meteoroloxía o permite.
Para a devandita mellora a Vicepresidencia Primeira e Consellería de Presidencia, Xustiza e Turismo da Xunta de Galicia concedeulle ao Concello de Mos unha subvención de preto de 31.000 euros.
O importe total do proxecto ascende a 44.198,5 euros, dos cales a Xunta achega unha axuda de 30.938,95 € e os 13.259,55 € restantes son aportación do Concello de Mos con fondos propios municipais.
A obra estará rematada aproximadamente no prazo dunha semana. Consiste en traballos de mellora da pista polideportiva da Urbanización de San Eleuterio, na parroquia de Tameiga, coa finalidade de renovar os pavimentos, os elementos de peche e protección, así como os elementos vinculados ao desenvolvemento da actividade deportiva.
As obras abarcan os conceptos seguintes: limpeza do pavimento da Pista Polideportiva. Limpeza dos muretes perimetrais da Pista Polideportiva. Desmonte do Peche Perimetral da Pista para a súa substitución. Pavimentación da Pista Polideportiva sobre o pavimento actual. Pintado do murete perimetral e dos xogos sobre o pavimento. E reposición do peche perimetral.
Os traballos comezaron procedendo a desmontar o peche perimetral da pista polideportiva, así como a retirada dos elementos deportivos que forman parte do mobiliario. Levouse a cabo a limpeza do pavimento da pista así como dos muretes perimetrais con lanza de auga a presión. Repúxose xa tamén o peche perimetral a base de malla metálica de simple torsión, con acabado plastificado e pintáronse os muretes perimetrais con pintura ao cemento.
E nestes intres procédese, sobre o pavimento actual, unha vez levados a cabo os traballos de limpeza, á aplicación do pavimento multicapa acrílico- epoxi. Tras o que se realizará o marcado das pistas de baloncesto, balonmán e fútbol sala.
Por último, dotarase á pista polideportiva de dúas porterías en substitución das existentes.
