viernes, marzo 29, 2024
InicioComarcasLouriñaMos colabora na axuda alimentaria para a poboación refuxiada

Mos colabora na axuda alimentaria para a poboación refuxiada

O Concello asina un convenio coa Asociación Solidariedade Galega co Pobo Saharaui

A presidenta da Asociación Solidariedade Galega co Pobo Saharaui, Maite Isla, e a alcaldesa de Mos, Nidia Arévalo, veñen de asinar no salón de sesións do Concello, o convenio de colaboración entre a asociación e a administración local.

A axuda municipal de este ano irá destinada ao proxecto da ONG denominado: “Axuda alimentaria para a poboación refuxiada Saharaui en Tindouf (Alxeria)” co cal se pretende dar solución á falta de alimentos básicos para os Refuxiados Saharauis.

Esta carencia dos produtos alimenticios máis básicos é causada por incumprimento, atrasos dos programas do Programa Mundial de Alimentos e do Alto Comisionado das Nacións Unidas para os Refuxiados e a insuficiencia da ración programada, ademais dos recortes das participacións dos doantes das axudas destinadas á Poboación Refuxiada Saharaui, os recortes de ECHO e, os grandes recortes na Cooperación descentralizada coa que se paliaba, no posible, parte do déficit constante nos Campamentos de Refuxiados Saharauis.

A isto engádese a actual pandemia de COVID-19 que agravou máis a situación xa existente nos Campamentos de Refuxiados Saharauis.

Solidariedade Galega co Pobo Saharaui elaborou un programa de actividades anual dividido en dous grupos en función do obxectivo perseguido polas mesmas. En primeiro lugar, inclúense no programa actividades de sensibilización da poboación tales como organización e/ou participación en charlas e coloquios, montaxe de exposicións fotográficas, realización de concertos solidarios e outros actos culturais. En segundo lugar desenrolamos Proxectos de Cooperación o Desenrolo, Proxectos de Axuda Humanitaria e de Emerxencia e Proxecto Sanitario e de Formación. Dentro dos cales inclúe o envío de alimentos, menciñas e outros materiais (material escolar, material sanitario, material informático, etc.). Tódolos proxectos e que se levan a cabo así como diversas actividades reivindicativas e de sensibilización execútanse en estreita colaboración e coordinación coa Delegación Saharaui para Galicia que á súa vez supervisa o seguimento e avaliación dos mesmos a través da Media Luna Roja Saharaui e o resto das institucións do Goberno Saharaui.

O Ministerio de Cooperación Saharaui e Media Luna Roja Saharaui son as dúas únicas entidades que determinan as prioridades respecto as necesidades da Poboación Refuxiada en cada momento a través da Delegación Saharaui en Galicia.

Co fin de traballar en coordinación existen comisións de traballo: Comisión de Caravana e Proxectos, Comisión de Política e Difusión, Comisión de Vacacións en Paz, Comisión de Dereitos Humanos e Comisión Médica

ARTIGOS RELACIONADOS

+ POPULAR

COMENTARIOS RECENTES