Non será necesario ter a máscara posta cando esteamos na praia tomando o sol ou cando nos bañemos, pero si debemos pola ao acceder aos areais ou nos paseos pola beira do mar. Acordo do ministerio de Sanidade e as autonomías para modificar a lei de nova normalidade.

No documento aprobado este mércores no Consello Interterritorial do Sistema Nacional de Saúde contémplase o cambio. Non será obrigatorio usar máscara nos períodos de descanso antes ou despois do baño ou a práctica de deporte no medio acuático, na contorna do mesmo, durante o baño e durante a práctica de deporte.

A máscara si será obrigatoria durante o paso polos accesos a praias, lagos e demais contornas naturais; no paseo á beira do mar e dos demais contornas acuáticas; nos vestiarios de piscinas públicas ou comunitarias, salvo nas duchas; e cando se permaneza no exterior ou interior de establecementos de hostalaría fóra dos períodos necesarios para comer ou beber.
Non será obrigatorio o seu uso nas actividades de socorrismo ou rescate cando requiren acceder ao medio acuático, e nos períodos estritamente necesarios para comer ou beber, en lugares nos que estea autorizado.

Galicia: Si, no deporte en zona urbana

O conselleiro de Sanidade, Julio García Comesaña, expresou no seo do consello interterritorial que Galicia defende a obrigatoriedade do uso da máscara cando o deporte se practica pola rúa con outros transeúntes. "Non digo unha pista forestal", aclarou.

Actualmente, a lei de nova normalidade fixa que as máscaras non serán de uso obrigatorio cando se realice un "esforzo físico intenso", de carácter non deportivo, ao aire libre e de forma individual, a condición de que se manteña 1,5 metros de distancia, segundo acordaron este mércores o Ministerio de Sanidade e as comunidades autónomas no pleno do Consello Interterritorial do Sistema Nacional de Saúde. A Xunta defende que si sexa obrigatoria ao facer ese "esforzo físico" en zona urbana.

A lei de "nova normalidade" fora  aprobada o pasado 18 de marzo no Congreso dos Deputados e publicada no Boletín Oficial do Estado (BOE) o pasado martes, na que se establecía a obrigatoriedade de utilizar máscaras en todos os lugares e circunstancias.

¿E ti, es de Tweet?