A cota de neve estará entre 400 e 600 metros este xoves en Galicia e as temperaturas sufrirán un lixeiro descenso.
A Axencia Estatal de Meteoroloxía activou un aviso amarelo nas montañas e o centro de Lugo e tamén nas zonas altas de Ourense por acumulacións de polo menos 5 centímetros de neve. Este xoves houbo xeadas en moitos puntos do interior.
O venres a borrasca moverase algo cara ao Cantábrico. Seguirá formando o corredor de aire polar, pero ademais enviará unha nova fronte que deixará choivas máis intensas nas provincias da Coruña e Lugo. A cota de neve situarase pola mañá nos 600 metros e irá ascendendo aos 800 metros pola tarde. As temperaturas continuarán sen cambios, en valores baixos para a época do ano e con formación de xeadas.
O sábado, a borrasca retírase cara ao norte de Portugal e Galicia quedará nunha situación intermedia entre altas e baixas presións. Será unha xornada con nubes baixas e aínda algunha precipitación de carácter débil e co avance do día iranse abrindo algúns claros. A cota de neve situarase nos 900 metros. As temperaturas experimentarán xa un lixeiro a moderado ascenso.
O domingo só quedará a influencia do anticiclón e, por tanto, volverá ser unha xornada de ceos despexados. A previsión a medio prazo destaca que o sistema de altas presións seguirá moi reforzado e cun amplo radio de acción que se estende desde a Península ata Islandia e exercendo de bloqueo #ante as borrascas que cruzan o Atlántico.
