A Garda Civil desarticulou un grupo criminal itinerante especializado no roubo con forza en domicilios tras unha serie de asaltos cometidos en Galicia. A denominada Operación Ribera-Mariñas saldouse coa detención de tres persoas de nacionalidade chilena —dous homes de 33 e 26 anos, e unha muller de 28— cando fuxían cara a Cataluña tras subtraer xoias e efectos valorados en 100.000 euros nunha vivenda de Oleiros.
Os investigadores determinaron que a banda actuaba cun alto nivel de especialización. No asalto perpetrado no municipio coruñés, executado a plena luz do día nunha zona residencial, os delincuentes empregaron inhibidores de frecuencia e ferramentas técnicas para forzar os accesos aproveitando a ausencia dos propietarios. As pescudas do Grupo de Delitos contra o Patrimonio da Policía Xudicial da Coruña vinculan tamén a este grupo con, polo menos, dous roubos cometidos a xornada anterior no centro urbano de Vigo, mentres se investiga a súa posible implicación noutros feitos similares nas provincias de Pontevedra e León.
A identificación do vehículo utilizado na fuxida, grazas á colaboración da Policía Local, permitiu organizar un dispositivo de seguimento en coordinación coa Comandancia da Garda Civil de Zaragoza. A interceptación produciuse na autovía A-68, á altura do municipio aragonés de Alagón. Durante a intervención, os ocupantes opuxeron unha forte resistencia antes de ser reducidos. No interior do turismo, os axentes recuperaron gran parte do botín de Oleiros, incluíndo aneis, pulseiras e diversas pezas de ouro.
O operativo destapou ademais o amplo historial delitivo dun dos arrestados, coñecido co alias de ‘El Chicorte’. A través dos mecanismos de cooperación internacional coa Policía de Investigacións e os Carabineros de Chile, confirmouse que este individuo era un obxectivo prioritario no seu país. As autoridades chilenas atribúenlle o liderado dunha organización criminal en Santiago de Chile vinculada ao narcotráfico, tráfico de armas, branqueo de capitais e varios homicidios.
Tras pasar a disposición do Tribunal de Instancia de Zaragoza, decretouse o ingreso en prisión provisional, comunicada e sen fianza para os tres membros da banda, mentres se inician os trámites para a extradición do fuxitivo a Chile.
Fontes: Europa Press, Garda Civil.
