A empresa galega Urovesa consolida a súa posición estratéxica co novo e importante encargo achegado dende Portugal. Os ministerios de Defensa de España e do país veciño asinaron este mércores un Memorando de Entendimiento (MoU) no Forte de São João Baptista, en Oporto, para a adquisición conxunta de vehículos militares todoterreno de alta mobilidade táctica. No caso do Estado luso, a operación supón a compra de 75 unidades por un valor estimado de 133 millóns de euros.
A sinatura do acordo contou coa presenza da ministra de Defensa española, Margarita Robles, e do seu homólogo luso, Nuno Melo, ademais doutras autoridades coma a secretaria de Estado de Defensa, Amparo Valcarce, e o contralmirante Antonio Mateus. A operación inscribeuse baixo o instrumento europeo Security Action for Europe (SAFE), un mecanismo deseñado pola Unión Europea para acelerar as inversións en capacidades defensivas críticas.
Unha compra clave para o Corpo de Fuzileiros
A adquisición dos novos vehículos militares estará destinada de maneira específica ao Corpo de Fuzileiros da Marinha, a Infantería de Mariña de Portugal. Segundo trasladou o Ministerio de Defensa Nacional portugués á axencia Lusa, a decisión de elixir de novo á firma galega estivo motivada porque o Exército luso xa conta cunha ampla experiencia previa co modelo, dispoñendo de máis dun cento de unidades operativas, o que permitirá optimizar e aproveitar os recursos xa existentes.
As entregas deste novo lote están programadas para desenvolverse de maneira progresiva entre os anos 2027 e 2029. Non se trata dunha colaboración nova entre ambas as partes, xa que a compañía galega xa entregou con anterioridade 139 vehículos ao país veciño grazas a un contrato formalizado a finais de 2018 que se completou no ano 2021.
Apostas pola defensa europea
Durante o acto oficial celebrado en territorio portugués, Margarita Robles destacou a importancia do acordo non só para a cooperación bilateral, senón para a consolidación dunha defensa común no marco comunitario. Tal e como explicou a titular española, con este tipo de iniciativas e co exercicio do programa SAFE estase a poñer en valor o traballo conxunto e o compromiso coa paz e a seguridade.
Pola súa banda, o Ministerio de Defensa Nacional luso ratificou os detalles económicos e materiais dun pedido que reforza a vixencia comercial e tecnolóxica dos todoterreos Vamtac nun contexto marcado pola necesidade de potenciar as capacidades tácticas dos estados membros da Unión Europea.
