A xustiza aperta ao Concello de Redondela para que cumpra sen máis dilacións coa ordenanza que o obriga a constituír un departamento propio de prevención e extinción de incendios. A sala primeira do Contencioso do Tribunal Superior de Xustiza de Galicia (TSXG) ditou unha sentenza o pasado 15 de xullo de 2026 na que confirma que a administración local debe acatar a execución forzosa ditada no seu día polos xulgados de Vigo, lembrando que, ao superar os 29.000 habitantes, esta prestación resulta de carácter obrigatorio.
A resolución xudicial chega despois de que un veciño denunciase ante os tribunais que o consistorio redondelán non iniciara ningún tipo de trámite para dar cumprimento á condena firme, tentando baleirar de contido a resolución mediante recursos e alegacións sobre posibles fórmulas alternativas de colaboración.
A vía do convenio con Vigo non é válida
Ante a esixencia de crear o departamento contra o lume, o goberno de Redondela escusouse argumentando que mantén contactos para asinar un acordo de colaboración co parque de bombeiros de Teis e co Concello de Vigo. Entre os movementos achegados, o consistorio acreditara que en novembro de 2025 remitiu un escrito á concelleira de Seguridade viguesa para estudar a formalización dun convenio, ademais de contar cun informe favorable emitido en xaneiro de 2026 pola secretaría municipal para adherirse a un convenio con Seaga en materia de biomasa e prevención forestal.
Con todo, o TSXG foi contundente ao sinalar que tódolas xestións e negociacións orientadas a buscar fórmulas alternativas son «alleas a esta execución». O tribunal recalca que a orde xudicial estabelece a creación dun servizo propio de prevención de incendios no seo do concello e non prevé a prestación da tarefa a través doutros medios externos.
Un servizo inexistente na actualidade
O fallo xudicial pon de manifesto que, máis aló das alegacións presentadas pola administración local —incluíndo mencións a unha hipotética integración no área metropolitana ou acordos futuros—, a realidade probada é que o servizo de incendios non existe na actualidade en Redondela nin se está a prestar por ningún medio efectivo.
Por todo isto, a sala desestima os argumentos do consistorio e conclúe que o proceso de execución forzosa debe continuar estritamente nos termos fixados pola xustiza, obrigando ao concello a asumir as súas competencias en materia de seguridade e extinción.
