O Consello de Ministros aprobou en segunda volta o anteproxecto da nova Lei do Medicamento e os Produtos Farmacéuticos, unha norma coa que o Goberno central actualiza un marco legal que levaba inalterado dende o ano 2015. Tal e como informou o Executivo, a principal novidade radica na integración formal dos profesionais de enfermería e fisioterapia no equipo prescriptor do Sistema Nacional de Saúde, dentro do ámbito das súas respectivas especialidades. Para facelo efectivo, a lexislación fixa un prazo máximo dun ano para redactar protocolos interdisciplinares de coordinación que aseguren a seguridade clínica.
A medida xerou recelos no sector médico. A Organización Médica Colegial (OMC) e o Foro da Profesión Médica de España advertiron de que a prescrición é un acto clínico inseparable do diagnóstico e do seguimento reservado ao médico, polo que vixiarán que se delimiten con precisión as funcións para evitar ambigüidades.
Blindaxe de suministros e novas ferramentas farmacéuticas
Para combater os problemas de desabastecemento rexistrados nos últimos anos, a normativa crea a figura do “medicamento estratéxico”, permitindo á Axencia Española de Medicamentos e Produtos Sanitarios aplicar medidas regulatorias e económicas especiais cando a cadea de subministración dun fármaco esencial sexa vulnerable. Doutra banda, o texto abre a porta a un acceso acelerado a tratamentos innovadores para pacientes con necesidades urxentes, cuxa financiación pública dependerá de que se confirmen os seus resultados reais en saúde.
Ademais, a lei incorpora a cobertura legal para a entrega a domicilio de medicamentos destinada a persoas en situación de dependencia, con discapacidade ou problemas graves de mobilidade, e introduce un modelo de prezos dinámicos para medicamentos fóra de patente que busca fomentar a competencia no sector farmacéutico.
