A patrulla fiscal e de fronteiras da Garda Civil de Pontevedra incautouse de 246 paquetes de tabaco de contrabando en Salvaterra de Miño. O operativo tivo lugar o pasado 8 de xullo durante un control de verificación fiscal, momento no que os axentes deron o alto a unha furgoneta con matrícula estranxeira.
Segundo informou o corpo armado, o tabaco, que contaba con marca fiscal lusa, estaba distribuído en bolsas de plástico e caixas de cartón no interior do vehículo. Ademais, os axentes comprobaron que o condutor, un home de 67 anos de nacionalidade portuguesa, tiña parte dos paquetes colocados nun expositor cos seus respectivos prezos de venda xa marcados.
Superaba o límite legal
A mercancía foi intervida ao superar o límite establecido pola normativa española, que restrinxe a posesión de tabaco con marca fiscal estranxeira a un máximo de 10 paquetes por persoa. Tras o achado, a Garda Civil tramitou a correspondente denuncia administrativa por infracción de contrabando.
Dende o instituto armado recalcaron a importancia de retirar este tipo de produtos do mercado ilícito, xa que, máis aló do fraude fiscal, carecen de calquera tipo de control sanitario ou trazabilidade. Así mesmo, as autoridades lembran á cidadanía que a compra de tabaco debe realizarse unicamente en establecementos autorizados para evitar contribuír ao financiamento de redes delictivas.
