O porto exterior de Ferrol viviu este xoves unha xornada histórica coa descarga dos primeiros 700 vehículos da marca MG, propiedade do xigante chinés SAIC Motor. O acto, presidido polo titular da Xunta, Alfonso Rueda, e polo vicepresidente de SAIC, Wu Bing, oficializa o desembarco desta multinacional en Galicia, que aspira a transformar o futuro industrial da comunidade.
A descarga destes 700 automóbiles —distribuídos entre o mércores e o xoves— é só a punta do iceberg dun proxecto a longo prazo. Segundo confirmou o Executivo galego, o plan inclúe a instalación dunha planta de ensamblaxe en Ferrol e unha fábrica de compoñentes auxiliares nas Pontes, reforzando a posición de Galicia como un dos polos de automoción máis relevantes de Europa.
«Forte e imparable»
Durante o acto, celebrado no edificio multiusos de Prioriño, Wu Bing destacou o éxito desta primeira ruta loxística e fixo un chamamento a fortalecer a relación entre China e Galicia. «Que a nosa cooperación sexa como as olas do mar: forte e imparable», proclamou o directivo chinés, quen agradeceu a colaboración das administracións para establecer esta plataforma empresarial estábel.
Pola súa banda, Alfonso Rueda cualificou esta operación como o «primeiro paso dunha relación duradeira». O presidente da Xunta destacou que este proxecto non só beneficia a Ferrolterra, senón ao conxunto de Galicia, ao integrar a comunidade nas cadeas de valor globais e xerar novas oportunidades tecnolóxicas e industriais.
Un nodo estratéxico para o norte peninsular
A elección de Ferrol non é casual. A cidade converterase no nodo de distribución de vehículos de SAIC para todo o norte da península. O alcalde ferrolán, José Manuel Rey Varela, cualificou o investimento como un revulsivo «a gran escala» para o desenvolvemento local, subliñando o impacto positivo que terá na economía da zona.
SAIC Motor, o maior grupo automotriz de China, alcanzou o pasado ano os 4,5 millóns de vehículos entregados en todo o mundo. Coa marca MG consolidada como a máis vendida do xigante asiático en Europa, a aposta polo porto exterior de Ferrol busca optimizar a súa loxística nun mercado, o español, que consideran clave para a súa estratexia de expansión.
Os 700 vehículos desembarcados serán trasladados durante o próximo mes aos concesionarios de todo o país por vía terrestre, marcando o inicio operativo dunha alianza que, nas palabras dos seus responsables, «sempre mira cara adiante».
Escoita as declaracións de Rueda aquí:
