O alcalde de Vilamartín de Valdeorras, Enrique Álvarez Barreiro (PSOE), anunciou esta mañá no pleno municipal a súa dimisión definitiva. Tras 15 anos en política activa, a maioría deles á fronte do bastón de mando, o rexedor oficializou a súa saída alegando motivos estritamente persoais: “É unha situación difícil, pero a familia requíreme”, explicou ante a corporación.
Barreiro, canteiro e escultor de profesión, chegou á alcaldía en 2011, logrando desbancar a longa era da familia Candal. Aínda que os seus inicios estiveron marcados pola dificultade de gobernar en minoría e unha débeda municipal de 1,6 millóns de euros, o socialista conseguiu revalidar o apoio dos veciños nas urnas, acadando maiorías absolutas nas sucesivas convocatorias.
Un legado de cambio na xestión
Durante a súa despedida, o alcalde fixo balance dunha etapa que, segundo sinalou, marcou un antes e un despois no Concello. “Antes a xente entraba na casa do concello coa cabeza gacha, e agora entra para esixir os seus dereitos”, remarcou, poñendo en valor a estabilidade económica acadada e o traballo realizado para o impulso do rural.
A oposición municipal, encabezada por José Pinto, quixo agradecer publicamente o servizo prestado polo rexedor e desexoulle sorte na súa nova etapa.
Sherezade Núñez, a sucesora
O calendario de relevo xa está fixado. O próximo 8 de xuño celebrarase o pleno onde se fará efectiva a renuncia formal de Barreiro. Non obstante, o xa alcalde en funcións manterá a súa acta de concelleiro unhas semanas máis co obxectivo de votar a súa sucesora.
Todo apunta a que a actual número dous da lista socialista e deputada provincial, Sherezade Núñez, asumirá o bastón de mando como a próxima rexedora de Vilamartín de Valdeorras, dando continuidade ao proxecto político do seu predecesor.
