A Audiencia Nacional vén de dar un paso decisivo na investigación sobre o rescate público da aeroliña Plus Ultra. O xuíz José Luis Calama ordenou o bloqueo das contas bancarias de José Luis Rodríguez Zapatero, nunha medida cautelar que busca asegurar posibles responsabilidades económicas e evitar que os fondos investigados poidan ser movidos ou diluídos.
Esta decisión produciuse o mesmo martes en que o maxistrado levantou o segredo de sumario, citou ao expresidente como investigado e autorizou rexistros policiais na oficina de Zapatero, situada na rúa Ferraz de Madrid, e na empresa Whathefav, propiedade das súas fillas. A investigación céntrase en esclarecer se a axuda de 53 millóns de euros concedida polo Goberno a Plus Ultra durante a pandemia formou parte dunha rede de intermediacións e pagamentos que beneficiarían ao entorno do exxefe do Executivo.
Transferencias por preto de dous millóns de euros
Segundo recolle o auto xudicial, o xuíz detectou fluxos de diñeiro recorrentes que relacionan a Zapatero e á empresa das súas fillas con diversas consultoras e sociedades. O instrutor cifra en case dous millóns de euros os pagos recibidos polo expresidente e a firma familiar a través de distintas vías:
- Análisis Relevante: O auto sinala ingresos de 490.780 euros a Zapatero entre 2020 e 2025.
- Grupo Thinking Heads: Calama vincula transferencias por un total de 681.318 euros ao expresidente.
- Gate Center: A resolución rexistra envíos por valor de 352.980 euros cara ao exmandatario.
O xuíz sitúa a Zapatero no centro dunha “estrutura estable e xerarquizada de tráfico de influencias” para obter beneficios económicos mediante a mediación ante instancias públicas en favor de terceiros, como foi o caso da aeroliña Plus Ultra.
Presunta rede de ocultación
Un dos puntos máis sensibles da investigación é o contrato de Idella —outra sociedade vinculada ao empresario Julio Martínez, amigo persoal do expresidente—, que pactou cobrar o 1% do rescate de Plus Ultra se a axuda pública se aprobaba. O auto do xuíz vincula este acordo coa creación dunha sociedade en Dubái que podería servir para canalizar comisións fóra de España.
Pola súa banda, Zapatero defendeu publicamente en todo momento que os ingresos percibidos responden exclusivamente a traballos reais de consultoría, asesoramento e docencia no ámbito geopolítico, e que todos os seus movementos financeiros foron declarados mediante facturas e tributación ordinaria. A investigación, tras meses baixo segredo, sitúase agora nun estadio avanzado mentres a UDEF continúa coa análise da documentación incautada.
