Salceda de Caselas prepárase para acoller a XXXI Festa dos Callos o vindeiro domingo 7 de setembro. Unha trixésimo primeira edición que chega con grandes novidades e que promete ser a «máis sostible da historia».
Unha festividade sostible
Entre as grandes primicias deste ano, destaca a campaña «Salceda Sostible. Callos cero residuos». O obxectivo segundo apuntan dende o goberno local é «minimizar o impacto da festa a nivel de residuos e que estes sexan mellor xestionados».
A persoa encargada desta campaña é a técnica de residuos Sara Luque, quen presentou o resto de propostas ligadas a esta nova campaña. Así, a técnica explicou que o día da festa haberá contedores con cinco divisións perfectamente identificadas para que todas as persoas poidan reciclar. Ademais, repartiranse vasos reutilizables para evitar o uso de plásticos. A maiores, en lugar de botellas de plástico haberá o que foi denominado como «Furancho da auga«: fontes de auga filtrada e fresca repartidas polas inmediacións da festa.
A maiores, haberá un posto de información sobre residuos onde, ademais de ofrecer toda a información precisa aos e ás asistentes, se repartirá merchandaising relacionado co coidado do medio ambiente e tamén haberá unha ruleta con premios para os participantes. A actividade infantil tamén irá dirixida cara a sostibilidade.
XXXI Festa dos Callos de Salceda de Caselas
«As potas comezarán a ferver en torno á unha da madrugada da noite anterior ao 7 de setembro» así o anunciaba a xefa de cociña de Corén, Begoña Alonso, encargada de elaborar a deliciosa tapa o día da festa tras coller o relevo do seu pai, Alejandro Alonso, nesta misión.
As primeiras racións de callos comezarán a servirse na Esfarrapada en torno ás 9 ou 9:30 horas da mañá. O prezo da ración é, ao igual que o ano pasado, de 10 euros e inclúe pan, viño así como a cunca e a taza de barro gravada. No canto de preferir levar a ración para a casa, o prezo é de 7 euros a ración e recoméndase levar o propio recipiente, a pesar de que tamén haberá posto de venda de envases na propia festa.
Deste xeito, en total repartiranse entre os e as asistentes 1600 kg de ventre de vacún, 1200 kg de pata de vacún, 2300 kg de garbanzos, 450 kg de lacón, 325 kg de chourizo e 325 kg de sofrito nesta festa gastronómica que dá a benvida ao mes de setembro.
Un pregoeiro con moito humor
Outro dos grandes atractivos da festividade é o pregón, que este ano será o cómico galego David Amor o encargado de por a guinda de humor á festa.
Tras as actuacións das charangas Mil9 e Nova Jomanada, ás 13:00 dará comezo a lectura do pregón durante a hora punta da xornada.
Xa pola tarde, ás 18 horas darán comezo os xogos populares a cargo de Animar-T e ás 20 horas o monologuista e pregoeiro, David Amor, ofrecerá o seu espectáculo cómico no Auditorio Municipal de Salceda de Caselas a un prezo de cinco euros.
