As medidas económicas aprobadas polo Goberno para as persoas afectadas polo accidente ferroviario de Urda xa están recollidas no Boletín Oficial do Estado. O Real decreto-lei 32/2026, publicado este mércores, establece axudas directas e anticipos das futuras indemnizacións por responsabilidade civil para as vítimas e as familias das persoas falecidas.
No caso dun falecemento, os familiares poderán recibir ata 144.242,92 euros procedentes de dúas vías: unha axuda non reembolsable de 72.121,46 euros e outro importe idéntico como anticipo da indemnización por responsabilidade civil.
Esta cantidade poderá sumarse ás prestacións do Seguro Obrigatorio de Viaxeiros, que deben reclamarse ás aseguradoras das compañías ferroviarias. Se se percibe tamén esa cobertura, o importe total poderá alcanzar os 216.364,38 euros por falecemento, segundo a información publicada polo Goberno.
As persoas feridas tamén terán dereito a axudas e anticipos. As contías oscilarán entre os 2.404,04 e os 84.141,70 euros, en función da gravidade das lesións.
Axudas compatibles e exentas de tributación
O Executivo establece que as prestacións directas non terán que ser devoltas e estarán exentas do imposto sobre a renda das persoas físicas. Ademais, serán compatibles con outras subvencións, axudas e indemnizacións que poidan corresponder ás vítimas.
No caso dos anticipos por responsabilidade civil, a regulación contempla que, se a indemnización definitiva é inferior á cantidade adiantada, os beneficiarios non terán que devolver a diferenza. Se a indemnización que finalmente se recoñeza é superior, poderán percibir a parte que exceda do anticipo.
O decreto tamén incorpora medidas de protección laboral e da Seguridade Social. As baixas temporais derivadas do accidente terán a consideración excepcional de accidente de traballo a efectos da prestación económica, o que permite cobrar desde o primeiro día e aplicar unha contía do 75 % da base reguladora, fronte ao 60 % previsto para as continxencias comúns.
Como se poderán solicitar as prestacións
As axudas directas e os anticipos poderán tramitarse conxuntamente mediante un único procedemento. O prazo será de tres meses desde a publicación da resolución da Secretaría de Estado de Transportes que estableza o sistema de solicitude.
O Goberno habilitará dúas vías: a sede electrónica do Ministerio de Transportes e as oficinas de atención integral creadas nas delegacións e subdelegacións do Goberno e nas direccións insulares das comunidades onde residan persoas afectadas.
Estas oficinas prestarán asistencia para presentar a documentación e tramitar as solicitudes. Se algunha persoa non pode desprazarse, a Administración poderá atendela no seu domicilio.
O real decreto-lei inclúe tamén un mecanismo para limitar os prezos de determinados servizos de transporte e aloxamento afectados pola interrupción da conexión ferroviaria entre Madrid e Andalucía, co obxectivo de evitar incrementos abusivos durante a emerxencia.
Fontes: BOE, La Moncloa.
