Os sabores de outono serán os protagonistas este sábado, 24 de outubro, na terceira proposta das Xornadas Gastronómicas “Saborea o Mercado de San Antonio”. Tras o éxito rexistrado nos dous meses anteriores no que o mexillón e o bonito foron o ingrediente base dos platos agora é a quenda doutros produtos de temporada coma a cabaza, o lacón, os grelos e as castañas.
A partir das 11:00 h poderanse degustar tres elaboracións realizadas polo restaurante Al Dente: Risoto con cabaza e lacón; Lacón con grelos e Castañas confitadas con crema de mascarpone. O prezo da cada ración será de 6€.
Con esta iniciativa, dende o goberno local, buscan “pór en valor os produtos de temporada que se poden atopar nos postos do Mercado de San Antonio, ao tempo que a gastronomía serve tamén de reclamo para atraer a novos clientes á praza de abastos tudenses que dende hai unhas semanas conta co selo de Mercado Excelente”.
A concelleira de Mercados e Comercio, Ana Núñez, destaca a gran acollida que “esta proposta gastronómica está a ter cada mes nunha aposta polo produto local e de temporada”.
