O incremento dos envíos comerciais e o período vacacional do persoal puxeron ao límite o posto de control fronterizo situado nos muelles de Guixar, no porto de Vigo. A Subdelegación do Goberno en Pontevedra admitiu perante os operadores locais que as actuais instalacións son incapaces de xestionar o volume de actividade portuaria, provocando demoras que deixan listas de espera de ata 200 contedores diarios e tensionando gravemente á industria galega.
O malestar entre as empresas e asociacións sectoriais fíxose evidente ante unhas demoras que afectan directamente á competitividade loxística. Segundo sinalou o secretario xeral de Anfaco-Cytma, Roberto Alonso, a competitividade do sector esixe seguridade, previsibilidade e axilidade nos controis, advertindo que non se poden xestionar os volumes actuais con procedementos e medios que non evolucionaron ao mesmo ritmo. Pola súa banda, o presidente de Conxemar e da Federación de Usuarios do Porto, Eloy García, apuntou que estas últimas semanas están a ser especialmente complicadas para as firmas afectadas.
Falta de medios, carencias informáticas e récords de tráficos
O estrés que padece o centro de inspección de Guixar agudizouse polas vacacións estivais dos traballadores, mais os problemas estruturais arrastran deficiencias persistentes. Entre elas figuran a ausencia de ferramentas informáticas axeitadas para a xestión documental e a descoordinación na presentación de expedientes, uns factores que, sumados ao sistema actual e á aplicación de posicionado, fan que os retrasos sexan inevitables segundo trasladou a propia Subdelegación nun escrito enviado aos operadores do sur de Galicia.
Esta saturación choca co dinamismo económico das terminais viguesas. Tras pechar o ano 2025 cun récord histórico de movementos que medraron un 3,7% ata acadar as 309.153 unidades, o tráfico de mercancía contenerizada continuou a súa senda alcista cun incremento adicional do 0,8% no acumulado deste ano ata o mes de xullo. Ante este escenario, os sectores produtivos reclaman un centro dimensionado á actividade real dos muelles, dotado de persoal suficiente, instalacións modernas e unha axeitada planificación para os períodos de maior punta de traballo, lembrando que tras o verán a terminal afrontará tamén o reto loxístico da campaña de Nadal.
Un novo centro de control cun prazo dun ano e medio
Pola súa banda, o presidente da Autoridade Portuaria de Vigo, Carlos Botana, recoñeceu tras recibir un comunicado de empresas e transitarios afectados ao longo do mes de agosto que as instalacións de Guixar «se están quedando anticuadas para o crecimiento actual de los tráficos», xerando prexuízos económicos evidentes. Desde a institución portuaria estase a traballar nun paquete de medidas urxentes para mitigar a conxestión de xeito inmediato.
Como solución a longo prazo, Botana confirmou que o Porto de Vigo proxecta a construción dun novo posto de control fronterizo cunha inversión estimada en 20 millóns de euros, confiantede en poder dispoñer das novas instalacións nun prazo aproximado dun ano e medio. A transformación resulta fundamental para consolidar a Vigo como un porto alimentario de referencia na fachada atlántica, un papel onde ademais do histórico tráfico de peixe destaca agora o forte pulso comercial da fruta.
