A partir do próximo 15 de xuño, a veciñanza de Santiago de Compostela terá ao seu alcance un novo servizo gratuíto de información e asesoramento en materia de alugueiros. A iniciativa, xestionada pola entidade especializada Provivienda, busca aclarar os dereitos e obrigas das partes implicadas ante a crecente complexidade do mercado inmobiliario residencial.
O concelleiro de Urbanismo, Iago Lestegás, explicou que o asesoramento orientará aos inquilinos sobre cuestións como a imposición de contratos de temporada ou o incumprimento dos límites legais nos prezos do alugueiro. Ademais, informarase sobre as prórrogas aplicables e a normativa vixente, prestando especial atención á futura declaración de Santiago como zona de mercado residencial tensionado.
Horario e atención personalizada
O servizo, que terá unha duración inicial de 12 meses, atenderá aos cidadáns dous días por semana en horario de 09.00 a 14.00 horas:
- Venres: Atención presencial nas oficinas de Urbanismo, situadas na Rúa Casas Reais, número 8.
- Martes (pendente de confirmación definitiva): Atención telefónica.
Ademais, habilitarase un enderezo de correo electrónico para xestionar citas e resolver consultas por escrito. O Concello tamén implantará un sistema de seguimento para elaborar informes periódicos sobre a evolución do mercado do alugueiro na cidade.
Un plan contra o mercado tensionado
Esta medida enmárcase no Plan de medidas correctoras que acompaña a solicitude de Santiago para ser declarada zona de mercado residencial tensionado, unha petición que xa conta co visto e prace da Xunta de Galicia. “O problema da vivenda non é local, senón global”, sinalou Lestegás, incidindo en que o goberno local está a aplicar todas as ferramentas dispoñibles para favorecer o cumprimento da lei.
O servizo será prestado por Provivienda, unha organización con traxectoria no ámbito da vivenda desde 1989, dentro da estratexia municipal para reforzar a colaboración con entidades do terceiro sector.
