Os independentes de Ponteareas insisten en que o PXOM “que aprobou o propio bipartito” non contempla esos terreos para un edificio sanitario.
O Concello de Ponteareas fai saber,mediante un comunicado, que o “arquitecto municipal lembra que no PXOM xa se prevé un terreo específicamente para un novo equipamento sanitario, na zona onde se atopa o actual centro de saúde e que o máis coherente e lóxico é ofertar esa parcela analizando conxuntamente cos técnicos da Xunta se é apta ou non para atender as súas necesidades e, en caso negativo, analizar outras posibilidades”. Denuncia a administración local que levan “tres meses agardando polos técnicos da Xunta”.
A cuestión sobre a localización do novo centro de saúde de Ponteareas divide, de novo, ao bipartito porque o PSOE opta por localizar o novo edificio sanitario nos terrenos de Aceros del Tea, no casco urbano, mentres o BNG, o seu socio de goberno, insiste nos terreos que aparecen no PXOM.
Pola súa banda, Acip, o grupo dos independentes de Ponteareas, explica tamén que é a Xunta quen ten que dicir as características técnicas pero que, de todos os xeitos, di Juan Carlos Carrera, “foi o propio bipartito, BNG e PSOE, quenes aprobaron o PXOM” e que nese documento, tal e como recoñecen dende a administración local, “só recolle os terreos onde está o actual centro de saúde para edificios sanitarios”. Amáis, sinalou que na comisión que se celebrou esta semana, “o arquitecto dixo que aínda que agora se queira poñer como uso sanitarios o de Aceros del Tea non se asegura que se poidan empregar” e califica a posición dos socialistas de “populista”.
