Feijóo anunciou que esta semana o Sergas comezará a citar ás persoas vacinadas para que reciban a terceira dose da vacina contra a COVID-19. Con todo, insta ás galegas e galegos que recibiran un transplante a contactar cos servizos sanitarios se non fosen chamados nos próximos días.

 As persoas con transplantes serán a "primeira prioridade" para Galicia á hora de administrar a terceira dose da vacina, unha vez que foi autorizada polo Consello Interterritorial de Sanidade o pasado mércores. Así o dixo o presidente da Xunta tras a reunión do Consello da Xunta deste xoves.

O Sergas prevé comezar esta semana cos chamamentos. No caso de que a unha persoa con transplante non lle chegue notificación para acudir a recibir a terceira dose, Feijóo convidou a que "se poña en contacto" cos servizos sanitarios para concretar a cita.

Con todo, o presidente expresou que confía en que non se produzan excesivos problemas deste tipo, posto que estes pacientes están "en seguimento".

Cuestionado sobre cales serán os próximos colectivos en ser chamados para recibir a terceira dose, apuntou que Galicia "non se vai apartar dos criterios científicos".

Por tanto, emprazou a coñecer as consideracións dos expertos para concretar quen serán os próximos en ser vacinados, aínda que manifestou que entende que, logo dos inmunodeprimidos, debería continuarse por aqueles que completaron a pauta de vacinación "hai moito tempo".

¿E ti, es de Tweet?