O Concello de Baiona informa de que, tras a realización dun novo remostreo das augas de baño nas praias da Ladeira e Santa Marta, os resultados analíticos recibidos confirman que ambas as zonas presentan novamente unha calidade da auga de baño excelente, polo que quedan sen efecto as medidas preventivas adoptadas nos últimos días.
Á vista destes resultados favorables, realizouse a reposición da Bandeira Verde nos dous areais, permitindo o baño con total normalidade e garantías para as persoas usuarias.
Os datos obtidos no novo control realizado dentro do Programa de Vixilancia Sanitaria das Zonas de Baño da Xunta de Galicia acreditan que as augas recuperaron os parámetros habituais de calidade, cumprindo cos niveis esixidos para o seu uso recreativo e de baño.
Deste xeito, na actualidade, todas as praias do municipio de Baiona presentan unha calidade da auga excelente, ofrecendo as máximas garantías sanitarias tanto para veciños como para visitantes.
O Concello de Baiona “agradece a colaboración e comprensión mostradas durante a aplicación das medidas preventivas e reafirma o seu compromiso coa protección da saúde pública, a conservación do medio mariño e o mantemento dos máis altos estándares de calidade nos areais do municipio.
