A comarca do Ribeiro podería vivir unha reestruturación histórica. Os concellos de Ribadavia e Carballeda de Avia comezaron a avaliar a posibilidade de fusionarse nun único municipio, unha medida que os seus rexedores, César Fernández (PP) e Luis Milia (PSOE), consideran unha saída necesaria para encarar o futuro ante o severo descenso demográfico que sofre a zona.
O proxecto atópase nunha fase inicial de análise. Con todo, a necesidade de actuar é evidente: mentres Ribadavia, capital da comarca, conta con 4.917 veciños, Carballeda de Avia suma 1.172 habitantes, cunha poboación moi dispersa e envellecida.
O reto da supervivencia económica
A situación financeira é un dos motores desta proposta. O alcalde de Carballeda de Avia, Luis Milia, foi rotundo ao describir a asfixia das arcas municipais. “O que recaudas con impostos é pouco e o que che dá o Estado, igual; con iso non pagas ao persoal e tes que levar servizos a todos os pobos”, explica o rexedor. Milia advirte que a falta de masa crítica ameaza servizos básicos, como o centro de saúde ou o colexio, que están ao límite para manterse operativos.
Pola súa banda, o alcalde de Ribadavia, César Fernández, mantén unha postura de prudencia ante a delicadeza do proceso, pero amósase receptivo a explorar calquera iniciativa que mellore o benestar dos veciños.
Un proceso supedito á vontade veciñal
O alcalde de Carballeda de Avia deixou claro que non dará ningún paso sen o respaldo da cidadanía. “Irei casa por casa para coñecer a súa opinión. Se a maioría di que non, pois marcho feliz”, asegura Milia, que desexa deixar o concello “apuntalado” e con calidade de vida antes de rematar a súa etapa política.
A fusión podería traer beneficios tanxibles, como a mellora do transporte compartido e un maior acceso a subvencións públicas. Actualmente, os pequenos concellos teñen dificultades para cofinanciar os proxectos, un desembolso que se faría máis asumible nun concello unido.
O apoio da Deputación
O presidente da Deputación de Ourense, Luis Menor, valorou a posibilidade como un paso “absolutamente importante”. Menor destacou que a unión permitiría configurar un concello “perfectamente xestionable” e lembrou que a Xunta de Galicia ofrece incentivos específicos —como prioridade en subvencións e facilidades na xestión de débedas— para fomentar estas reestruturacións.
De concretarse, Ribadavia e Carballeda de Avia seguirían a estela doutras unións en Galicia, como Oza-Cesuras ou Cerdedo-Cotobade, sumándose a un proceso de modernización do mapa local que busca, por riba de todo, garantir a supervivencia dos servizos básicos no rural.
Fonte: La Voz de Galicia
