As alumnas do curso de costura do programa municipal “Tempo de Lecer” do Concello de Mos converteranse esta fin de semana nas protagonistas dun desfile moi especial que fusionará moda e historia nunha homenaxe á figura de María Vinyals, coñecida como a “derradeira herdeira” do Pazo de Mos.
O evento celebrarase o vindeiro sábado 30 de maio, ás 19:30 horas, nos xardíns do Pazo de Mos, nunha xornada presentada por Montse Martínez Muíños e aberta ao público.
As participantes do curso exhibirán as súas propias creacións, confeccionadas ao longo do ano, nun desfile na que elas mesmas farán a dobre función: deseñadoras e modelos.
O curso de costura “Tempo de Lecer”, no que participan 24 mulleres, converteuse xa en moito máis ca unha actividade formativa. Ademais de aprender novas técnicas de costura e confección, as alumnas atoparon neste espazo un punto de encontro marcado pola convivencia, a creatividade e a amizade.
“Estamos moi ilusionadas”, asegura Concha Crespo, alumna do curso, quen destaca o traballo realizado durante os últimos meses para preparar as pezas que agora verán a luz sobre a pasarela.
Chegado o momento, este sábado as alumnas mostrarán ao público as súas propostas de vestimenta, elaboradas artesanalmente e coidadas ata o máis mínimo detalle. O desfile busca poñer en valor non só o talento creativo das participantes, senón tamén o papel deste tipo de iniciativas como ferramentas de participación social, benestar e dinamización cultural.
A cita promete converter os xardíns do Pazo de Mos nun escenario único no que moda, patrimonio e emoción compartirán protagonismo nunha noite moi especial. A maiores, ao remate, haberá petiscos para todas as persoas asistentes.
