Pedro Sánchez superou este venres a José María Aznar como o segundo presidente do Goberno que máis tempo leva no palacio da Moncloa na historia democrática recente de España. Malia que os inicios do seu mandato estiveron marcados por unha moción de censura imprevista e por análises políticas que auguraban unha traxectoria breve e circunstancial, o actual líder do PSOE xa suma máis xornadas no cargo que o exdirixente popular. Co fito acadado hoxe, Sánchez só ten por diante a Felipe González, quen ostenta o liderado cun mandato que se estendeu durante case 14 anos.
Tal e como informou a axencia EFE a través dun recuento, Sánchez alcanzou este venres, 15 de mayo de 2026, un total de 2.905 días como presidente dende que tomou posesión do cargo o pasado 2 de xuño de 2018. Pola súa banda, José María Aznar permaneceu na presidencia un día menos, sumando un total de 2.904 xornadas. O podio estatal ségueo liderando Felipe González cun rexistro case inalcanzable de 4.903 días no Executivo, o que supón 2.000 xornadas máis que o actual presidente.
Un percorrido por diante de Rajoy e Zapatero
Ao longo da súa traxectoria no Goberno, Sánchez foi superando paulatinamente a outros mandatarios de longa duración na historia de España. O pasado 5 de febreiro avantaxou a José Luis Rodríguez Zapatero, quen estivo á fronte do Executivo durante 2.804 días (100 menos que Aznar).
Anteriormente, o líder socialista xa superara a Mariano Rajoy, a quen desaloxou do poder mediante a moción de censura, impedíndolle rematar a lexislatura. Rajoy acumulou .2354 días na Moncloa, aínda que as repeticións electorais e o tempo que permaneceu en funcións puideron telo achegado aos nove anos de mandato de non prosperar dita moción.
En comparación co resto de Europa, onde a media de permanencia dos mandatarios sitúase por baixo dos catro anos, España destaca por ter dirixentes máis estables no tempo, xa que os catro últimos presidentes superaron os sete anos de xestión.
Peso internacional e veteranía no Consello Europeo
No ámbito comunitario, Sánchez consolidouse como un dos dirixentes máis veteranos do Consello Europeo. Tras a caída de Viktor Orbán, o primeiro ministro croata Andrej Plenković, no poder dende 2016, é o único primeiro ministro que o supera en tempo no cargo.
Se o presidente español cumpre co seu propósito de esgotar a lexislatura actual, superará en veteranía ao mandatario francés Emmanuel Macron entre as grandes potencias da UE. Macron remata en xuño o seu segundo mandato de cinco anos e non poderá optar á reelección debido ao sistema presidencial de Francia. Dende que Sánchez chegou á Moncloa, coincidiu con sete primeiros ministros franceses e tres canceleris alemáns.
Segundo os cálculos elaborados polo propio Executivo español, o presidente compartiu estanza no Consello Europeo con 81 líderes distintos dos 27 países membros da Unión Europea, ademais de coincidir con dous primeiros ministros británicos antes de que se formalizase o Brexit. En total, nestes oito anos rexistráronse 58 cambios de liderado nos Estados membros, cunha media de tres primeiros ministros por país.
Proxección exterior fronte ao desgaste político en España
Mentres que no panorama internacional Sánchez vive un momento de recoñecemento mediático, a esquerda en España atópase nunha posición de debilidade. O desgaste político reflectiuse nos resultados das últimas tres eleccións autonómicas, unha tendencia que, segundo os indicadores, prevese que se confirme este domingo coas eleccións en Andalucía.
Fóra das fronteiras españolas, a figura de Sánchez gañou interese en medios de comunicación europeos, con solicitudes de entrevistas en Alemaña ou Italia. En Estados Unidos, o seu perfil espertou un novo interese mediático a raíz do seu posicionamento fronte a Donald Trump, a oposición á guerra de Irán ou as súas políticas de inmigración, motivando un amplo informe na revista The New Yorker. Ademais, durante a última cimeira progresista de Barcelona, o mandatario brasileiro Lula da Silva sinalouno de forma simbólica como un delfín político dentro da esquerda en Occidente.
Dende a contorna da Moncloa reivindícase esta veteranía dentro da Unión Europea para xustificar o maior peso e influencia de España na toma de decisións globais, como o recoñecemento de Palestina. Aínda que as enquisas reflicten un escenario complexo de cara ás eleccións de 2027, o círculo do presidente asegura que dará a batalla para optar a catro anos máis de mandato, o que o achegaría ás cifras de Felipe González sen chegar a superalo.
