A Garda Civil investiga catro menores, tres homes e unha muller de 16 e 17 anos, todos eles veciños de Nigrán, como presuntos autores de delitos de lesións, contra a integridade moral e de ameazas por agrediren un menor de 13 anos. Ademais, outro rapaz de 13 anos foi identificado.
Segundo informou a benemérita, os feitos ocorreron o pasado 10 de xaneiro, cando varios dos investigados retiveron o menor e o levaron á forza a un canellón na zona de Praia América, onde o agrediron.
A maiores, un dos menores implicados, realizou un vídeo da agresión, no que se aprecia como o agredido é golpeado e acaneado, obligándoo a poñerse de xeonllos. O vídeo foi posteriormente compartido entre varios menores.
A vítima da agresión, acompañado pola súa nai, presentou unha denuncia no Cuartel da Garda Civil de Baiona, que puxo en marcha unha investigación co obxectivo de identificar aos implicados, así como das numerosas testemuñas do lugar.
A Garda Civil explicou que grazas á colaboración dos colexios e institutos do Val Miñor se logrou identificar a todos os implicados. Ademais, os axentes realizaron dilixencias de menifestación co fin de determinar o grao de participación de cada un dos implicados.
Ademais, segundo o relato policial, outro menor amigo dos agresores, tamén investigado, que non se atopaba no lugar dos feitos, comezou a escribir mensaxes ameazantes á vítima para evitar a denuncia. As dilixencias foron postas ao dispor da Fiscalía de Menores.
