A Delegación do Goberno en Galicia vén de activar na súa fase de Alerta o Plan Invernal na Rede de Estradas do Estado das catro provincias galegas. Esta medida adóptase diante das predicións emitidas pola Axencia Estatal de Meteoroloxía (AEMET) e irase actualizando en función dos partes meteorolóxicos que emita AEMET nos próximos días, “xa que é previsible que a situación vaia empeorando conforme avancen as horas”, segundo informa a Delegación nun comunicado.
En concreto, a AEMET emitiu un aviso de nivel laranxa a partir da medianoite de hoxe ata a medianoite de mañá por importantes acumulacións de neve nas montañas de Lugo e Ourense e no interior da provincia de Pontevedra. Este aviso diminúe a amarelo no resto da provincia de Lugo (excepto A Mariña), así como no Miño, en Ourense, e interior da provincia de Pontevedra. En todo caso, dado que as previsións apuntan a un empeoramento da situación, a Delegación activa a fase de alerta no conxunto da Comunidade e pide á poboación que consulte as fontes oficiais antes de calquera desprazamento ou actividade no exterior.
Todos os recursos
A Delegación do Goberno, de acordo co Protocolo de Coordinación de Actuacións, mobiliza todos os recursos dispoñibles en Galicia para neutralizar os efectos que provoquen o frío e a neve nas estradas. Para iso notificou esta previsión aos organismos implicados en materia de vialidade e tráfico do Estado (Demarcación de Estradas, Garda Civil e Centro de Xestión de Tráfico do Noroeste-Cantábrico), así como ao resto de administracións. O obxectivo fundamental da activación é garantir a máxima fluidez posible de tráfico mantendo as infraestruturas de transporte de competencia estatal en condicións de uso.
A Delegación do Goberno lembra que que, para esta campaña, “os medios do Ministerio de Transportes e Mobilidade Sostible contemplan máis de 450 profesionais, 103 máquinas quitaneves, 20.000 toneladas de sal e máis de 3.257.000 de litros de salmoira en Galicia”.
Recomendacións
A Delegación do Goberno lembra que as medidas xerais de protección a adoptar diante un temporal de neve e frío son:
Se se vai a viaxar:
• Solicitar información previa do estado das estradas e da situación meteorolóxica.
• Evitar a viaxe en coche sempre que non sexa necesario e utilizar, se é posible, transporte público.
• En caso de ser imprescindible a utilización do vehículo, revisar pneumáticos, anticongelante e freos. Ademais, hai que ter a precaución de encher o depósito ou manter carga suficiente nas baterías, e levar cadeas e elementos de abrigo.
• Así mesmo, é recomendable levar un teléfono móbil e dispositivo de alimentación do mesmo.
• Ir moi atento para ter especial coidado coas placas de xeo. É difícil determinar en que lugar do traxecto poden formarse, aínda que xeralmente as zonas de sombría son as máis habituais.
Se queda atrapado pola neve:
• Debe permanecer no coche, se o temporal lle sorprende dentro do mesmo.
• Así mesmo, é conveniente manter o motor do vehículo aceso e a calefacción posta, coidando renovar cada certo tempo o aire. É moi importante evitar quedar durmido.
• Nos vehículos de combustión, comprobar que se mantén libre, en todo momento, a saída do tubo de escape para que o fume non penetre no coche.
• Se é posible, tente sintonizar as emisoras de radio, que seguramente lle informarán das predicións meteorolóxicas, as informacións oficiais sobre o estado da situación e as indicacións que se dean respecto diso.
• Se ten acceso a rede móbil, consultar as redes sociais dos organismos oficiais e forzas de seguridade así como as de medios contrastados.
