Un home de 70 anos, veciño do Porriño, terminou presuntamente esta mañá coa vida da traballadora do Servizo de Axuda no Fogar (SAF) que atendía á súa muller tras golpeala repetidas veces cun obxecto cortante, considérase que puide ser cun machado.
Os feitos ocorreron a primeira hora desta mañá no domicilio familiar situado na parroquia de Atios no que vive un matrimonio maior. A muller ten unha enfermidade incapacitante que a mantén encamada e pola que recibe a atención do SAF. Mentres a vítima atendía á muller do suposto autor, o home golpeouna con dito obxecto repetidamente ata causarlle a súa morte.
Axentes da Garda Civil atoparon a auxiliar morta cun forte golpe na cabeza cando entraron no fogar. No lugar, foi atopado tamén o presunto autor do asasinato, con manchas de sangue, desorientado e realizando manifestacións incoherentes.
Ata o momento, non se coñece desencadenante algún. A auxiliar de axuda no fogar traballaba para a empresa que presta o servizo no Concello do Porriño, tiña 48 anos e era veciña de Mos.
Segundo apuntou o subdelegado do Goberno en Pontevedra, Abel Losada «a falecida non figura na base de datos de VioGén e non hai indicios que apunten á violencia de xénero como causa dos feitos». Engadiu que «a Garda Civil está á espera do resultado da autopsia, xa realizou a comprobación da escena e instrúe as dilixencias para o completo esclarecemento dos feitos».
Segundo informaron veciños e veciñas da vila, o suposto homicida non consta de ningunha enfermidade mental diagnosticada, mais si que recoñecen que o home tiña reaccións extrañas.
Ata o lugar trasladáronse os servizos de emerxencia, pero os equipos médicos non puideron facer nada para salvarlle a vida á traballadora.
