O Rosal prepárase para combater a calor cunha orixinal e refrescante proposta: unha xincana acuática gratuíta para a rapazada. Esta actividade dará o pistoletazo de saída aos «Tardeos na Praza», un programa que durante os meses de xullo e agosto encherá de vida e dinamismo a Praza do Calvario.
A primeira cita será este xoves 10 de xullo ás 19:30 horas. A xincana acuática gratuíta para nenos e nenas ofrecerá probas divertidas como brilé con esponxas, desafíos de puntería con pistolas de auga, lanzamento de globos con paracaídas e un circuíto de obstáculos acuático, «asegurando que todos os participantes rematen empapados e con sorriso», segundo indican desde o Concello.
O verán 2025 no Rosal
A alcaldesa do Rosal, Ánxela Fernández Callís, destacou que «cos Tardeos na Praza queremos que a nosa veciñanza viva un verán diferente, poñendo en valor os nosos espazos públicos como escenario de lecer, encontro, diversión e convivencia. Esta xincana acuática é só o comezo dun programa deseñado para conseguilo».
Tardeos na Praza
Os «Tardeos na Praza» traerán catro xornadas con propostas para públicos moi diversos, enchendo de vida e dinamismo a Praza do Calvario e reforzando a aposta do Concello por iniciativas que favorecen o lecer e a convivencia durante todo o ano.
Deste xeito, os tardeos no Rosal comezarán o 19 de agosto cun tributo ao cantautor Joanquín Sabina a partir das 21:00 horas e o 21 de agosto, Roberto Caco será o que poña a música no municipio do Baixo Miño. A última data co «tardeo» será o 30 de agosto con Masstreta Orquesta.
![Pinterest](https://pinterest.com/pin/create/button/?url=https://www.siradio.gal/2025/07/07/o-rosal-estrea-o-seu-veran-refrescante-con-xincana-acuatica-e-cos-tardeos-na-praza/&media=https://www.siradio.gal/wp-content/uploads/2025/07/10-xullo-xincana-acuatica.jpg&description=O Rosal lanza os "Tardeos na Praza" este xoves 10 de xullo cunha xincana acuática gratuíta para nenos e nenas){kind=link}