Vigo prepárase para acoller a primeira edición do Galicia Fest, un novo festival que promete marcar un antes e un despois no calendario musical galego. Hoxe desvelouse unha das súas grandes sorpresas: a incorporación de Mikel Izal, quen se suma ao cartel como un dos nomes máis destacados e esperados. O festival celebrarase os días 29 e 30 de agosto no Muelle de Trasatlánticos no corazón da cidade olívica.
Música indie en Galicia
O Galicia Fest posicionase como o novo festival indie pop de confección urbana do sur de Galicia. Con celebración no centro de Vigo e o mar como telón de fondo, non é só unha proposta sonora, «senón tamén unha declaración cultural«, segundo indican desde a organización. Neste contexto, o obxectivo é «establecer sinerxias entre o público e os artistas nun ambiente musical e social íntimo, único, apaixonante e vibrante».
A incorporación de Mikel Izal, sinónimo de calidade artística, potencia escénica e conexión co público, foi definida como «un auténtico privilexio, reforzando a aposta do festival por un cartel de gran nivel con artistas de consolidada traxectoria».
Programación do Galicia Fest
Venres, 29 de agosto:
- Mikel Izal
- Dorian
- La Habitación Roja
- Samuraï
- Sexy Zebras
- Éxtasis
- Xunto a outro artista pendente de anunciar.
Sábado, 30 de agosto:
- Beret
- Leire Martínez
- Fredi Leis
- Hey Kid
- Maldita Nerea
- Marlon
- Noan
- Paula Koops.
Durante a presentación do festival, na que participaron a vicepresidenta da Deputación de Pontevedra, Luisa Sánchez, a delegada territorial da Xunta en Vigo, Ana Ortiz, e membros da organización, todos coincidiron en que “a incorporación de Mikel Izal representa unha aposta pola excelencia e reforza o noso compromiso cun xénero que define a esencia do festival, que marcará un antes e un despois no calendario musical galego”.O Galicia Fest conta co patrocinio da Xunta de Galicia a través da Axencia de Turismo de Galicia, no marco de Concertos do Xacobeo, e da Deputación Provincial de Pontevedra.
Mercar as entradas para o Galicia Fest
Actualmente atópase dispoñible o segundo tramo de abonos para poder desfrutar de todo o Galicia Fest, cun prezo de 50 euros máis gastos de xestión. Tamén se poden adquirir xa as entradas de cada día a un prezo de 35 euros máis gastos de xestión na páxina web.
