A IX Gala do Deporte de Tomiño congregou un ano máis aos deportistas e entidades deportivas locais nun evento marcado pola emoción, o recoñecemento e a celebración colectiva do excelente momento que vive o deporte no municipio. Un evento celebrado o pasado domingo no auditorio de Goián que serviu e que serviu para como espazo de encontro para deportistas, clubes, entidades e veciñanza. A alcaldesa de Tomiño, Sandra González, destacou que “a Gala do Deporte é unha oportunidade para recoñecer publicamente o esforzo silencioso de moitas persoas que fan medrar o deporte cada día, desde as bases ata o alto rendemento, e para poñer en valor o papel do deporte como elemento clave para construír comunidade”.
Esta gala, dirixida polo presentador Terio Carrera, contou coa música en directo de Terapia de Grupo, que puxo banda sonora a todo o acto, e coa presenza dun referente do deporte como Iván Raña, que este ano se acercou a acompañar ás e aos deportistas tomiñeses neste día tan especial. Como salientaba o concelleiro de Deportes, Rubén García, “o máis importante desta gala é que representa todo un ano de traballo, ilusión e compromiso por parte de deportistas, clubs e familias, demostrando que o deporte tomiñés está vivo, medra e segue avanzando con forza”.
Ao longo da gala recoñeceuse a labor e compromiso de Protección Civil coa seguridade nas probas deportivas locais co premio a institución colaboradora co deporte, así como o labor de entidades que fomentan o deporte que recaeu en clubs de nova creación como Pickleball Tomiño e o Club de Patinaxe Royal Tomiño. A II San Silvestre Tomiñesa foi distinguida como mellor evento deportivo, mentres que o equipo de tiro con arco Arco Trasno recibiu o premio a inclusión no deporte.
Tamén houbo mencións especiais para o Tomiño Femenino pola incrible tempada que realizaron, para Miro Gómez, que representa a todas esas persoas que traballan para que o fútbol de afeccionados non perda a súa esencia; e para Melisa Lorenzo, copilota de rallye que realizou unha fenomenal tempada 2025. Ademais, realizouse o recoñecemento a Daniel Costa como mellor adestrador e ao Club Deportivo Miño-Teixugos como mellor club base. O talento emerxente destacouse co galardón a mellor promesa masculina para Lois Montenegro e mellor promesa feminina para Nerea Álvarez, ambos xoves piragüístas do equipo miñoto.
No apartado de máximos recoñecementos individuais, o futbolita do Real Club Celta Pablo Durán foi elixido mellor deportista masculino absoluto, convertido xa nun dos grandes nomes do deporte tomiñés, mentres que a padexeira Uxía Rodríguez repetiu por segundo ano como a mellor deportista feminina absoluta, recoñecendo así o seu esforzo, dedicación e resultados. Estes galardóns puxeron o broche final a unha gala que simboliza o bo estado do deporte en Tomiño, unha comunidade que ao longo do ano vive o deporte con intensidade e que nesta cita anual se reúne para celebrar e compartir os seus éxitos colectivos.
